Հոկտեմբերի 31-ին Կոմիտասի թանգարան-ինստիտուտում մեկնարկել է «Սոցիալական պաշտպանության դերը կայուն զարգացման օրակարգում․ չանտեսելով ոչ ոքի Հայաստանում» խորագրով համաժողովը։ Այսօր՝ համաժողովի երկրորդ օրը, ելույթով հանդես է եկել Աշխատանքի և սոցիալական հարցերի նախարարի տեղակալ Զարուհի Բաթոյանը։
Նախարարի տեղակալը նշել է տարբեր սոցիալական խմբերի անտեսված լինելու 5 պատճառները՝ խտրականություն, աղքատություն, վատ կառավարում, մարդու բնակության վայր, ցնցումների հանդեպ դիմակայունություն, և անդրադարձել դրանցից ամենակարևորին՝ խտրականությանը։
«Մենք այսօր ապրում ենք մի երկրում, որտեղ մարդուն վիրավորելու, նրան թուլացնելու համար թիրախավորում են նրա առողջական վիճակը, սեռը, տարիքը կամ արտաքինը, որտեղ միջավայրի և ծառայությունների անմատչելիությունը չի համարվում խտրականություն։ Մեզանում, ցավոք, մարդուն աշխատանքից հեռացնելը նրա սեռական կողմնորոշման պատճառով, կամ ՄԻԱՎ/ՁԻԱՀ–ով ապրող մարդուն առողջապահական ծառայություններ չտրամադրելը օրինաչափ և նորմալ երևույթ է ընկալվում։ Մենք ապրում ենք մի երկրում, որտեղ հոգեկան առողջության խնդիր ունեցող անձի՝ համայնքում ապրելու իրավունքը միշտ դրվում է կասկածի տակ։ Սրանք լուրջ խնդիրներ են, որոնք մենք պետք է ճանաչենք, հասկանանք և մտածենք դրանց լուծման ուղիների մասին, եթե իսկապես չենք ուզում անտեսել ոչ ոքի։
Եթե իսկապես ուզում ենք ապրել նոր Հայաստանում, չենք կարող ընտրողաբար տրամադրել ծառայությունները, մենք պետք է դրանք տրամադրենք բոլոր այն քաղաքացիներին, ովքեր ունեն դրա կարիքը։ Եվ այդ ամենը պետք է անենք ոչ միայն մարդու իրավունքի պաշտպանությունից կամ մարդասիրությունից ելնելով, այլ նաև այն պատճառով, որ բոլորը պետք է իրենց ներուժը մեր երկրի զարգացմանը ծառայեցնելու հնարավորություն ունենան։ Մենք չենք կարող մեր քաղաքացիներին անտեսելու ճոխությունը թույլ տալ մեզ, որովհետև բոլորս ունենք միմյանց կարիքը»,- նշել է Զարուհի Բաթոյանը։
Բաթոյանի կարծիքով՝ ոլորտում բացթողումները շատ են, դժվարությունները պետք է հաղթահարել միասին՝ գերատեսչությունների, տեղական ու միջազգային կազմակերպությունների համատեղ ուժերով։ Նախարարի տեղակալը կարևորում է հատկապես սոցիալական աշխատողների ունեցած ներդրումը։
«Եթե սոցիալական ոլորտի մասնագետը չհավատա մարդու զարգացման հնարավորություններին, հավասար չվերաբերվի բոլորին, մենք լուրջ դժվարություններ կունենանք։ Պետք է կրթենք մեր մասնագետներին, հզորացնենք նրանց կարողությունները։ Եվ հույս ունեմ, որ այս համաժողովը ևս կնպաստի դրան»,- ընդգծել է պաշտոնյան։
«Սոցիալական պաշտպանության դերը կայուն զարգացման օրակարգում» խորագրով համաժողովը կշարունակվի նաև վաղը։ Համաժողովին մասնակցելու համար Հայաստան են եկել սոցիալական ոլորտի մասնագետներ և փորձագետներ աշխարհի առաջատար երկրներից։
Համաժողովի օրակարգում քննարկվել են նաև ընտանիքի և երեխաների վրա աղքատության ազդեցության մեղմացմանն ու մարդկային կապիտալի զարգացմանը վերաբերող հարցերը։
Քննարկումներից բացի այս օրերին կազմակերպվում են նաև թեմատիկ ցուցահանդեսներ, այցելություններ սոցիալական ծառայությունների մատուցման տարբեր կենտրոններ։
