25-ամյա Սվետլանա Պետրոսյանը արդեն մեկ տարուց ավելի որպես ծրագրավորող աշխատում է «Այթիռեսուրսիս» ծրագրավորման ընկերությունում: Զբաղվածության պետական ծրագրի շրջանակներում եռամսյա վճարվող պրակտիկայի շրջանակներում ուսուցում ստանալուց հետո նա աշխատանքի է անցել նույն կազմակերպությունում:
Սվետլանան սովորել է ԵՊՀ կիրառական մաթեմատիկայի բաժնում, սակայն ուսումն ավարտելուց հետո իր մասնագիտությամբ աշխատանք գտնել չի կարողացել: Ընկերուհու միջոցով տեղեկացել է զբաղվածության պետական ծրագրերի մասին, այցելել է զբաղվածության տարածքային կենտրոն, հաշվառվել և սպասել առաջարկի:
«Տեղեկացա Զբաղվածության տարածքային կենտրոնների մասին, որտեղ կազմակերպում են մասնագիտություն ունեցողների ուսուցումը գործատուների մոտ»,-պատմում է Սվետլանան:
Աշխատանքային պրակտիկայի կազմակերպման ծրագիրը երիտասարդների կողմից ամենասիրված ծրագրերից մեկն է, որը 2014 թ.-ից իրականացվում է ԱՍՀՆ Զբաղվածության պետական գործակալության կողմից: Ծրագրի նպատակն է աջակցել ձեռք բերած մասնագիտությամբ առաջին անգամ աշխատաշուկա մուտք գործողին իր մասնագիտական որակավորմանը համապատասխան մասնագիտական աշխատանքային փորձ ձեռք բերելու հարցում: Ձեռք բերած փորձը օգնում է երիտասարդին աշխատաշուկայում դառնալ մրցունակ՝ այդպիսով մեծացնելով նրա աշխատանք գտնելու հնարավորությունները:
Սվետլանան պատմում է, որ իր մասնագիտությամբ դժվարացել է աշխատանք գտնել, քանի որ ամենուր պահանջում էին հմտություններ, որոնք միայն պրակտիկ աշխատանքի շնորհիվ էր հնարավոր ձեռք բերել:
«Նույնիսկ սկսնակ մասնագետ չէի, երբ եկա այստեղ: Ես նոր էի ավարտել ուսումս, պրակտիկ փորձ չունեի: Այստեղ եմ սկսել իրական աշխատանք կատարել, և դա ամենաարժեքավոր փորձն է, որ կարող էի ունենալ: Այստեղ ինձ տրվել են առաջադրանքներ, որոնց իրականացման հետ կապված հարցերով դիմում էի փորձառու մասնագետներին, ովքեր ինձ օգնում էին, իմ հարցերին պատասխանում»,- պատմում է Սվետլանան:
«Այթիռեսուրսիս» ընկերության տնօրեն Դավիթ Շահբազյանը նշում է, որ երբ գործատուն գիտելիքներն է կիսում նրա հետ, ով ցանկանում է սովորել, անհրաժեշտ են նաև երաշխիքներ, որ դա ռեսուրսների վատնում չէ.
«Յուրաքանչյուրի հետ աշխատանքում, ով գիտի միայն տեսություն, գործատուն ռեսուրս և ժամանակ է ծախսում, նախ նրա անձնային որակները հասկանալու, իսկ հետո մասնագիտական որակների զարգացման հնարավորությունները պարզելու համար: Գործատուին տրամադրվող աջակցությունն օգնում է կանխել ռիսկը, որը կարող է լինել պրակտիկայի ավարտից հետո, եթե ուսուցանվողը որոշի, որ միասին չենք աշխատելու: Հակառակ դեպքում՝ ցանկացած գործատու կարևորում է գիտելիք ունեցող մասնագետին և երբեք չի ցանկանա կորցնել նրան»,-նշում է տնօրենը:
Պրակտիկայի ամբողջ ժամանակահատվածում, որը տևում է երեք ամիս, պրակտիկանտին տրամադրվում է գումար՝ նվազագույն աշխատավարձի չափով: Գործատուի մոտ աշխատանքային փորձի ձեռքբերման գործընթացը կազմակերպող մասնագետը ևս վճարվում է՝ նվազագույն ամսական աշխատավարձի 50 %-ի չափով: Բացի այդ գործատուին տրամադրվում է գումար՝ պրակտիկանտի աշխատավարձից հաշվարկվող եկամտային հարկը և նպատակային սոցիալական վճարները փոխհատուցելու համար:
«Եթե դու մասնագետ չես ու մասնագիտական աշխատանքային փորձ չունես, ապա նվազագույն աշխատավարձի չափով փոխհատուցումը բավարար է, ու նման աջակցությունը չի խանգարի առօրյան կազմակերպելու համար: Նորավարտները պետք է գիտակցեն, որ կարևոր փորձը ձեռք է բերվում սովորելու միջոցով: Պետք է ձգտել կատարելագործել հմտությունները՝ որպես մասնագետ կայանալու համար»,- ասում է Սվետլանան:
«Ծրագրի իրականացման ողջ ընթացքում զբաղվածության տարածքային կենտրոնը լինում է շահառուի կողքին: Այցելություններ ենք կատարում գործատուին և հավաստիանում, որ ծրագրի շահառուն գոհ է ընթացքից, իսկ ծրագիրն ընթանում է սահմանված նպատակին համապատասխան»,- ասում է ԶՊԳ ծրագրերի իրականացման մեթոդական աջակցության և խորհրդատվության բաժնի պետ Ռուզան Արշակյանը:
