Աշխատանքի և սոցիալական հարցերի նախարարության նախաձեռնությամբ՝ ԱՍՀ նախարարի տեղակալներն ընդունել են սոցիալական պաշտպանության ոլորտում գործունեություն իրականացնող հասարակական կազմակերպությունների և սոցիալական նախաձեռնությունների ներկայացուցիչներին՝ քննարկելու հայ-ադրբեջանական սահմանին տիրող իրավիճակով պայմանավորված սոցիալական ծառայությունների մատուցմանն առնչվող մի շարք հարցեր։
Հանդիպմանը մասնակցել են նաև Տարածքային կառավարման և ենթակառուցվածքների նախարարության, Միասնական սոցիալական ծառայության, Միգրացիոն ծառայության, Երևանի քաղաքապետարանի ներկայացուցիչները։
ԱՍՀ նախարարի տեղակալները ներկայացրել են Աշխատանքի և սոցիալական հարցերի նախարարության կողմից այս պահին տարվող աշխատանքները․ հասարակական կազմակերպությունների և սոցիալական նախաձեռնությունների ներկայացուցիչների հետ պայմանավորվածություն է ձեռք բերվել նախարարությունների համակարգմամբ իրականացնել քայլեր՝ ըստ անհրաժեշտության և համատեղ քննարկվող ձևաչափերին համապատասխան։
