Երեխաների իրավունքների խախտումների դեմ արդյունավետ պայքարի իրականացման, առանց ծնողական խնամքի մնացած երեխաների իրավունքների պաշտպանության, վերջիններիս որդեգրմանն ու խնամատարությանն առնչվող որոշ հարցերի հստակեցման նպատակով՝ երեխաների հիմնահարցերի ոլորտում նախատեսվում է իրականացնել առանցքային բարեփոխումներ․ օրենքների նախագծերը հանրային քննարկման են ներկայացվել e-draft իրավական ակտերի նախագծերի հրապարակման միասնական կայքում։
Նախագծերի ընդունման արդյունքում նախատեսվում է՝
- ազգային օրենսդրությունը համապատասխանեցնել միջազգային օրենսդրությանը՝ իրականացնելով Հայաստանի Հանրապետության կողմից ստանձնած միջազգային պարտավորությունները,
- ամրագրել երեխայի լավագույն շահերի պարտադիր ապահովումն իրեն վերաբերող, ներառյալ՝ որդեգրման ու խնամատարության հարցերում,
- հստակեցնել երեխայի պաշտպանության համակարգում խնամակալության և հոգաբարձության մարմինների, տարածքային կառավարման մարմինների ու լիազոր մարմնի լիազորությունները և երեխայի պաշտպանության ընթացակարգերը,
- ամրագրել համայնքի սոցիալական աշխատողի հստակ գործառույթները երեխայի պաշտպանության ոլորտում՝ ապահովելով խնամակալության և հոգաբարձության մարմինների գործունեությունը մասնագիտական հիմքերի վրա,
- ստեղծել երեխայի պաշտպանության բազմամասնագիտական խորհուրդներ մարզպետարանների, իսկ Երևան քաղաքում՝ Երևանի քաղաքապետարանի կողմից երեխայի պաշտպանության գործռույթների իրականացմանն աջակցելու համար,
- ամրագրել լիազորող նորմ, որով կսահմանվի կյանքի դժվարին իրավիճակում հայտնված, այդ թվում՝ առանց ծնողական խնամքի մնացած, երեխաների բացահայտման առանձնահատկությունները, այդ գործընթացում պետական և տեղական ինքնակառավարման մարմինների ու հասարակական կազմակերպությունների համագործակցությունը և այլն։
Նախագծերով առանձնացվում են նաև օտարերկրյա որդեգրման առանձնահատկությունները, իրավական որոշակիություն է ամրագրվում ՀՀ ընտանեկան օրենսգրքում, սահմանվում է ալիմենտի վճարների անկանխիկ ձևով ընդունման կարգավորումը։
Նախագծերը մշակվել են ՀՀ աշխատանքի և սոցիալական հարցերի նախարարության կողմից՝ ՄԱԿ-ի մանկական հիմնադրամի աջակցությամբ:
