ՀՀ աշխատանքի և սոցիալական հարցերի նախարարության համակարգում գործող Նորքի տուն-ինտերնատն իր ավանդույթների համաձայն շարունակում է ուրախություն և հաճելի պահեր պարգևել իր տարեց բնակիչներին:
Գարնանային գեղեցիկ տոնի՝ մարտի 8-ի առիթով հաստատության անձնակազմը միջոցառումների շարք էր նվիրել մեր տատիկներին:
Վաղ առավոտից տուն-ինտերնատում եռուզեռ էր սկսվել՝ տատիկները շտապում էին գեղեցկանալու, իսկ պապիկներից ոմանք էլ իրենց ձեռքով պատրաստած նվերներով անհանգիստ պտտվում էին նախասրահում՝ սպասելով տատիկներին:
Օրն հաճելի ու անմոռաց դարձնելու համար հրավիրվել են երգիչներ, երգչուհիներ, պարային խմբեր, որոնք գեղեցիկ երաժշտական կատարումներով և շնորհավորանքներով ոգևորեել և հրաշալի պահեր են պարգևել հաստատության տարեց բնակիչներին՝ նրանց մասնակից դարձնելով իրենց երգին ու պարին:
Սրտանց շնորհավորելով տատիկներին, հաստատության անձնակազմը մաղթել է նրանց ամուր առողջություն և գարնանային բարձր տրամադրություն` նվիրելով նրանց գեղեցիկ վարդեր:
Տոնական օրը Նորքի տուն ինտերնատում ավարտվել է մեկ այլ անակնկալով՝ բացվել է հաստատության բնակիչների համար վերջերս նորոգված ու ժամանակակից տեխնիկայով ու նյութերով հագեցած ատամնաբուժարան, որն այսուհետ բարձր որակի ատամնաբուժական ծառայություն է մատուցելու տարեցներին:
