Այսօր ՀՀ աշխատանքի և սոցիալական հարցերի նախարարությունում տեղի ունեցավ աշխատանքային քննարկում «Հաշմանդամություն ունեցող անձի վերականգնողական անհատական ծրագրի կազմման, վերականգնողական անհատական ծրագրում ընդգրկված վերականգնողական միջոցառումների իրականացման և իրականացմանն աջակցության կարգ»-ի վերաբերյալ:
Նախարար Արտեմ Ասատրյանը քննարկման սկզբում կարևորեց հաշմանդամների հիմանահարցերի ոլորտում իրականացվող բարեփոխումները՝ այս համատեքստում ընդգծելով Վերականգնողական անհատական ծրագրի դերը հաշմանդամություն ունեցող անձանց վերականգնման ևհասարակությանը ինտեգրվելու գործընթացում:
Քննարկմանը ներկայացվեց Վերականգնողական անհատական ծրագրի (այսուհետ՝ ՎԱԾ) կառուցվածքը և բովանդակությունը, խոսվեց ՎԱԾ-ի բժշկական, մասնագիտական և սոցիալական ծրագրերի մասին և թե ինչ կարևոր սկզբունքներով է առաջնորդվում յուրաքանչյուր ծրագիր՝ հաշմանդամություն ունեցող անձի հետ աշխատելիս:
Քննարկման ընթացքում հնչեցին մտահոգություններ կապված ծրագրի արդյունքների ընթացիկ գնահատման հետ, եղան առաջարկություններ կարգի մեջ որոշ փոփոխություններ անելու հետ կապված:
Նախարար Արտեմ Ասատրյանը քննարկմանը ներկա մասնակիցներին հանձնարարեց քննարկման ընթացքում հնչած առաջարկությունների և դիտողությունների հիման վրա լրամշակել, ամբողջացնել ծրագրի փաթեթը և առաջիկայում ներկայացնել վերջնական քննարկման:
Քննարկմանը մասնակցում էին փոխնախարարներ, ոլորտին առնչվող ստորաբաժանումների ղեկավարներ:
