Հունիսի 20-ին ՀՀ-ում ԱՄՆ դեսպան Ռիչարդ Միլսը ՀՀ աշխատանքի և սոցիալական հարցերի նախարարության Ընտանիքի, կանանց և երեխաների հիմնահարցերի վարչության պետ Գեղանուշ Գյունաշյանի և ՅՈՒՆԻՍԵՖ-ի ներկայացուցիչների ուղեկցությամբ այցելել է Վանաձորի մանկատուն:
Երեխաների պաշտպանության ոլորտում իրականացվող բարեփոխումների ընթացքին ծանոթանալու նպատակով դեսպանը զրուցել է նախարարության և ՅՈՒՆԻՍԵՖ-ի ներկայացուցիչների հետ, քննարկել մանկատների բեռնաթափման և երեխաներին՝ ընտանիք վերադարձնելու հեռանկարները:
«Այլընտրանքային ծառայությունների բացակայության պատճառով երեխաների պաշտպանության ներկայիս համակարգը նպաստում է, որպեսզի հաշմանդամություն, հատուկ կրթական կարիքներ ունեցող երեխաների ծնողները և սոցիալապես անապահով ընտանիքները ձգտեն երեխաներին ուղարկել շուրջօրյա խնամքի հաստատություններ՝ ժամանակավոր կամ մշտական խնամքի համար: Այս երեխաները, ինչպես և ցանկացած այլ երեխա, իրավունք ունի հասակ առնել ընտանիքում կամ ազգականների: Որտեղ հնարավոր է, մենք պետք է համախմբենք մեր ջանքերը պաշտպանելու այս երեխաների իրավունքները և այդ կերպ օժանդակելով, որ պահպանվի ընտանիքը»,-ասել է դեսպան Միլսը:
Դեսպանի խոսքով՝ կյանքի դժվարին պայմաներում հայտնված երեխաների վերաբերյալ ԱՄՆ կառավարության գործողությունների ծրագրի շրջանակում 2015թ. հոկտեմբերին Հայաստանը ընտրվել էր որպես առաջնային մասնակից, ինչը թույլ է տալիս հետևողականորեն աջակցել երեխաների պաշտպանությանն ուղղված բարեփոխումներին: ՀՀ կառավարությունը ԱՄՆ ՄԶԳ-ի, ՅՈՒՆԻՍԵՖ-ի, Վորլդ Վիժըն, Սեյվ դե չիլդրեն, Հույսի կամուրջ կազմակերպությունների հետ միասին աշխատում է ռիսկային խմբերի երեխաների խնամքի բարելավման հարցերի շուրջ:
«Նպատակներից մեկը, որի ուղղությամբ համագործակցում են ԱՄՆ և ՀՀ կառավարությունները շուրջօրյա խնամքի հաստատությունների բեռնաթափումն է»,-ընդգծել է դեսպանը:
Այնուհետև, դեսպանը շրջել է մանկատան տարածքով, ծանոթացել պայմաններին, զրուցել մանկատան անձնակազմի և սաների հետ:
