«Աշխատանքի միջազգային համաժողովն իր ուրույն դերն ունի Աշխատանքի միջազգային կազմակերպության գաղափարախոսությանն ու սկզբունքներին աջակցելու և դրանք ամրապնդելու գործում: Այն կարևոր հարթակ է ապահովում փոփոխվող աշխարհում ահագնացող մարտահրավերները բացահայտելու և դրանց անդրադարձ կատարելու հարցում:
Իմ երախտիքի խոսքն եմ հայտնում ԱՄԿ գլխավոր տնօրեն պարոն Գայ Ռայդերին, ընդգրկուն և նպատակային զեկույցների համար:
Կցանկանայի նաև ընդգծել ԱՄԿ-ի և եռակողմ գործընկերների դերը ՄԱԿ-ի Կայուն Զարգացման 2030 օրակարգի արդյունավետ իրականացման հարցում՝ մասնավորապես ուղղված ներառական տնտեսական աճի խթանմանը, կայուն զբաղվածության և արժանապատիվ աշխատանքի ապահովմանը:
Վերոնշյալ կարևոր պայմանների ապահովումը և բոլոր գործընկերների ջանքերի համատեղումը՝ աղքատությանը վերջ դնելու և ներառական հասարակություններ կառուցելու լավագույն միջոցն են:
Գլոբալ ձեռքբերումները սկսվում են ազգային մակարդակում:
Հայաստանի Հանրապետության կառավարությունը հավատարիմ է միջազգային չափանիշներին համահունչ բարեփոխումներ իրականացնելուն՝ սոցիալական պաշտպանություն և հավասարություն, կայուն զբաղվածություն և բոլորի համար արժանապատիվ աշխատանք ապահովելու համար:
Վերջին տարիներին բազմակողմանի բարեփոխումներ են իրականացվել աշխատանքի, զբաղվածության և սոցիալական պաշտպանության ոլորտներում:
Հայաստանի 2014-2025թթ. զարգացման ռազմավարությունը երկրի հեռանկարային զարգացման համար որպես առաջնահերթություն սահմանում է զբաղվածության աճը, աղքատության վերացումը, սոցիալական պաշտպանության համակարգի կատարելագործումը:
ԱՄԿ-ի հետ սերտ համագործակցության արդյունքում 2015 թ. Աշխատանքային օրենսգրքում էական փոփոխություններ են տեղի ունեցել, որոնք միտում ունեն աշխատանքի ազգային օրենսդրությունը համապատասխանեցնել ԱՄԿ կոնվենցիաներին և այլ միջազգային չափանիշներին:
Վերջին տարիներին զգալի առաջընթաց է արձանագրվել նաև սոցիալական գործընկերության ազգային մակարդակում:
Համաձայն ՀՀ 2013-2018 թթ. Զբաղվածության ռազմավարության՝ ընթացքի մեջ են գտնվում նաև զբաղվածության ոլորտում իրականացվող բարեփոխումները:
2014թ. ուժի մեջ է մտել զբաղվածության մասին ՀՀ օրենքը, որի միջոցով ներդրվել է ակտիվ զբաղվածության պետական քաղաքականության նոր մոդելը, որի նպատակն է կայուն զբաղվածություն ապահովել հատկապես խոցելի իրավիճակներում գտնվող անձանց, ովքեր դժվարություններ ունեն աշխատաշուկայում ընդգրկվելու տեսանկյունից, հատկապես՝ հաշմանդամություն ունեցողները, կանայք, երիտասարդները, փախստականները, վերադարձող միգրանտները, սոցիալապես անապահով ընտանիքների անդամները:
Զբաղվածության նոր մոդելի համաձայն զբաղվածության պետական կարգավորման 14 ակտիվ ծրագրեր են ներդրվել:
Սոցիալական ծառայությունների որակի և հասանելիության բարելավումը, պետական և ոչ պետական դերակատարների ջանքերի համատեղումը կարևոր բաղադրիչներ են ներառական հասարակություն ձևավորելու և աղքատությանը վերջ դնելու համար:
Ուրախությամբ պետք է նշեմ, որ ԱՄԿ-ն ակտիվորեն ներգրավված է եղել և աջակցել նշված բարեփոխումների իրականացման գործընթացում:
Հայաստանի կառավարության և սոցիալական գործընկերների անունից իմ երախտագիտությունն եմ հայտնում շարունակական համագործակցության և աջակցության համար:
Օգտվելով առիթից՝ ցանկանում եմ նաև ողջունել և կարևորել ԱՄԿ «Աշխատանքի ապագան» խորագրով նախաձեռնությունը:
Մենք մեր պատրաստակամությունն ենք հայտնել միանալու նախաձեռնությանը և ակտիվորեն համագործակցել այդ շրջանակներում:
Լիահույս եմ, որ հետևողական աշխատանքը և ԱՄԿ բոլոր գործընկերների ընդհանուր ջանքերը հնարավորություն կտան դիմակայել ներկայիս մարտահրավերներին, ապահովել սոցիալական արդարություն, արժանապատիվ աշխատանք և բարգավաճող հասարակություն:
Շնորհակալություն»:
