ՀՀ աշխատանքի և սոցիալական հարցերի նախարար Արտեմ Ասատրյանը հունիսի 1-ին մասնակցել է Երեխաների պաշտպանության միջազգային օրվա առիթով Սիրահարների այգում կազմակերպված «Երեխաների ձայնը» միջոցառմանը:
Նախարար Արտեմ Ասատրյանը շրջել է տաղավարներով, ծանոթացել երեխաների իրավունքների ինքնատիպ ներկայացումներին, նոր ձեռնարկներին, շփվել տարբեր հասարակական կազմակերպությունների ներկայացուցիչների հետ, որոնք, իրենց հերթին նախարարին են ներկայացրել ոլորտում իրենց գործունեությունը: Կարևորելով յուրաքանչյուրի աշխատանքը երեխաների պաշտպանության ոլորտում՝ նախարարը բոլորին հաջողություններ է մաղթել ծրագրերի իրականացման գործում:
Իսկ սիրիահայերի տաղավարի մոտ նախարարը միջոցառման մյուս հյուրերի հետ միասին համտեսել է արևելյան քաղցրավենիքներ, ծանոթացել նրանց ձեռքի աշխատանքներին:
Երեխաների պաշտպանության օրվան նվիրված իր ելույթում նախարարը կարևորել է տոնը ընտանեկան միջավայրում նշելու ավանդույթը և ընդգծել յուրաքանչյուր ծնողի՝ երեխային ուղղված լավ ապագա ունենալու ցանկությունը:
«Այսօրվա խորհուրդն ու առիթը, այս գեղեցիկ միջոցառման կազմակերպումը գալիս է փաստելու, որ դա ոչ միայն պետական մարմինների, կառավարության խնդիրն է, այլև ողջ հասարակության: Քաղաքացիական այս ակտիվությունը երեխաների ոլորտում իսկապես օրինակելի համագործակցություն եմ համարում: Մենք բոլորս մեր ներուժը ներդնում ենք և պետք է շարունակենք ներդնել, որպեսզի մեր երեխաները ունենան լավ ապագա, լինեն մեր երկրի լավ քաղաքացիներ, շենացնեն մեր երկիրը շարունակեն իրենց ծնողների գործը:
Ես ցանկանում եմ որպեսզի այս տրամադրությունը լինի մեր ընտանիքներում տարվա 365 օրը»,- ասել է նախարար Արտեմ Ասատրյանը:
Միջոցառմանը մասնակցում էին ՀՀ սփյուռքի նախարար Հրանուշ Հակոբյանը, Եվրոպական միության պատվիրակության ղեկավար Պյոտր Սվիտալսկին, ԱՄՆ դեսպան Ռիչարդ Միլսը, ՄԱԿ-ի Փախստականների հարցերով գերագույն հանձնակատարի գրասենյակի ներկայացուցիչ Քրիստոֆ Բիերվիրթը, ովքեր նույնպես իրենց բարեմաղթանքներով շնորհավորել են երեխաներին և նրանց ընտանիքներին:
Միջոցառումը կազմակերպել էր «Սեյվ դը Չիլդրեն» հասարակական կազմակերպությունը իր գործընկների հետ միասին:
