ՀՀ աշխատանքի և սոցիալական հարցերի նախարար Արտեմ Ասատրյանը, ՀՀ սպորտի և երիտասարդության հարցերի նախարար Գաբրիել Ղազարյանը և ՀՀ Կոտայքի մարզպետ Կարապետ Գուլոյանը, Ծաղկաձոր քաղաքում օգոստոսի 31-ին մասնակցել են ՀՀ Նախագահի մրցանակի համար անցկացվող «Հաշմանդամություն ունեցող լավագույն մարզիկ» մրցույթի փակման հանդիսավոր արարողությանը:
Նախարար Արտեմ Ասատրյանը ողջունել է մրցույթի մասնակիցներին և հետագա բոլոր մրցաշարերում փայլուն խաղ ցուցադրելու և նորանոր հաղթանակներ կերտելու հաջողություններ մաղթել:
Այնուհետև՝ նախարարները պատվոգրեր և մրցանակներ են հանձնել մարզիկներին:
Ծաղկաձորում օգոստոսի 28-ին մեկնարկած մրցաշարին մասնակցում էին ՀՀ մարզերի և Երևան քաղաքի լսողական, տեսողական, հենաշարժողական խնդիրներ և մտավոր սահմանափակումներ ունեցող մարզիկներ և հասարակական կազմակերպությունների ներկայացուցիչներ, որոնք մրցում էին շախմատ, սեղանի թենիս, դարթս, բազկամարտ, շաշկի, եռամարտ և բասկետբոլ մարզաձևերում:
Միջոցառման ավարտին նախարար Արտեմ Ասատրյանը հաշմանդամություն ունեցող 12 մարզիկների հանձնել է մարզումների համար նախատեսված ակտիվ տիպի անվասայլակներ:
