ՀՀ կառավարության 08.09.2016թ. նիստում ընդունված որոշման համաձայն ՀՀ աշխատանքի և սոցիալական հարցերի նախարարության ենթակայությամբ գտնվող հատուկ տիպի մանկատների կանոնադրություններում կատարվել են փոփոխություններ, որոնց համաձայն «Գյումրու «Երեխաների տուն» և «Խարբերդի մասնագիտացված մանկատներում բարձրացվել է երեխաների տարիքային շեմը:
«Գյումրու «Երեխաների տուն» ՊՈԱԿ-ը, որը նախատեսված է 0-6 տարեկան երեխաների շուրջօրյա խնամքի համար, իրականացնում է 125 երեխայի շուրջօրյա խնամք, սակայն խնամվող երեխաներից 45-ի վեց տարին լրացել է և նրանք շարունակում են խնամվել մանկատանը` պայմանավորված այլ հաստատություն տեղափոխելու անհնարինությամբ:
Մանկատան շենքային պայմանները թույլ են տալիս խնամել մինչև 130 երեխայի. և որոշման համաձայն առաջարկվում է երեխաների տարիքային շեմը բարձրացնել մինչև ութ տարեկան:
«Խարբերդի մասնագիտացված մանկատուն» ՊՈԱԿ-ը նախատեսված է 220 երեխայի շուրջօրյա խնամքի համար, սակայն տարիներ շարունակ, տեղափոխության տարբերակ չունենալու պատճառով, մանկատանը շարունակում են խնամվել մեծ թվով 18 տարին լրացած անձինք: Ներկայում չափահասների թիվը կազմում է 128:
Փոփոխության համաձայն հաստատությունում կխնամվեն մանկատուն մինչև 18 տարին լրանալն ընդունված և 18-ից հետո մանկատանը խնամվող հաշմանդամություն ունեցող անձինք:
ՀՀ աշխատանքի և սոցիալական հարցերի նախարարության ենթակայությամբ գտնվում են երեք հատուկ /մասնագիտացված/ հաստատություններ, որոնք նախատեսված են ծանր սահմանափակ կարողություններ ունեցող` կենտրոնական նյարդային համակարգի օրգանական և ֆունկցիոնալ ախտահարումներով, բնածին և ձեռքբերովի ֆիզիկական և մտավոր խնդիրներ ունեցող երեխաների շուրջօրյա խնամքի համար:
