ՀՀ աշխատանքի և սոցիալական հարցերի նախարար Արտեմ Ասատրյանը հուլիսի 16-ին ընդունել է ՀՀ-ում Ճապոնիայի արտակարգ և լիազոր դեսպան Էյջի Տագուչիին:
Նախարար Արտեմ Ասատրյանը շնորհավորել է դեսպանին Հայաստանում նշանակվելու կապակցությամբ և հույս հայտնել, որ հայ-ճապոնական համագործակցությունը սոցիալական ոլորտում նոր հեռանկարների և նոր ծրագրերի հիմք կհանդիսանան:
Այնուհետև Արտեմ Ասատրյանը ներկայացրել է սոցիալական պաշտպանության ոլորտում ընթացող բարեփոխումները, մասնավորապես՝ ինտեգրված սոցիալական ծառայությունների համակարգը, սոցիալական աշխատողի ինստիտուտը, որտեղ կարևորել է սոցիալական աշխատողի դերը, նրա կողմից ընտանիքի կարիքների գնահատումը և, ըստ այդ կարիքների, համապատասխան սոցիալական ծառայությունների տրամադրումը:
Նախարարը անդրադարձել է նաև Հայաստանում զբաղվածության ոլորտում իրականացվող քաղաքականությանը, ոլորտի ակտիվ ծրագրերին:
Դեսպան Տագուչին իր հերթին շնորհակալություն է հայտնել նախարարին սոցիալական ոլորտում ընթացող բարեփոխումները ներկայացնելու համար և նշել, որ Ճապոնիայի կառավարությունը պատրաստ է ամրապնդել համագործակցությունը սոցիալական պաշտպանության ոլորտում:
Հանդիպման ավարտին նախարար Արտեմ Ասատրյանը հաջողություններ և արդյունավետ աշխատանք է մաղթել դեսպանին դիվանագիտական գործունեության մեջ:
