Հոկտեմբերիի 20-ին, ժամը 10:00-ին Երևան քաղաքի «Արամ Խաչատրյան» համերգասրահի տարածքից մեկնարկել է Երևան-Էջմիածին մարաթոնը՝ հաշմանդամություն ունեցող անձանց մասնակցությամբ: Մարաթոնի մեկնարկին ներկա են գտնվել ՀՀ աշխատանքի և սոցիալական հարցերի նախարար Արտեմ Ասատրյանը, ԵՄ պատվիրակության ղեկավար, դեսպան Պյոտր Սվիտալսկին:
Ողջունելով Հայաստանի հաշմանդամների «Փյունիկ» միության նախաձեռնությամբ իրականացվող միջոցառումը՝ նախարարը չափազանց կարևորել է յուրաքանչյուրի ներդրումը մեր հասարակությունում հավասար իրավունքներ և հնարավորություններ ապահովելու գործում:
«Անցյալ տարի ՀՀ կառավարությունը հռչակել էր հավասար հնարավորությունների և հավասար իրավունքների տարի և այն միջոցառումները, որոնք իրականացվել են տարվա ընթացքում, ներկայումս շարունակվում են՝ սկսած ոլորտի խնդիրների բարձրաձայնումից մինչև խնդիրների առարկայական լուծումները: Ուզում եմ շնորհակալություն հայտնել մեր բոլոր գործընկերներին, ովքեր այս գործընթացում հետևողական աշխատանքի և անմիջական մասնակցության շնորհիվ իրենց լուման են ներդնում խնդիրների լուծման ուղղությամբ: Շնորհավորում եմ բոլորիս, ցանկանում եմ բարի երթ և հաջողություններ»,-ասել է նախարարը:
ԵՄ պատվիրակության ղեկավար, դեսպան Պյոտր Սվիտալսկին նույնպես ողջունել է միջոցառման մասնակիցներին և նշել, որ այս մարաթոնը միտված է մտածելակերպի փոփոխությանը և շատ կարևոր է հաշմանդամություն ունեցող անձանց կարիքներին վերաբերող խնդիրների իրազեկման համար: «Մենք բոլորս հավասար ենք, ունենք հավասար իրավունքներ և ՀՀ կառավարության հետ այս միասնական արշավը ուղղված է հենց հավասար իրավունքների ապահովմանը»:
Ելույթներից հետո հաշմանդամություն ունեցող և չունեցող ավելի քան հարյուր մասնակից անվասայլակներով, հեծանիվներով և ոտքով շարժվել են դեպի Էջմիածին:
