Մայիսի 11-ին ՀՀ աշխատանքի և սոցիալական հարցերի նախարարությունում տեղի ունեցավ նախարարության և լուսանկարիչ Վիգեն Մնոյանի նախաձեռնությամբ կազմակերպված` Հայրենական մեծ պատերազմի մի խումբ վետերանների լուսանկարների ցուցահանդեսի բացման արարողությունը, որին ներկա էին նախարար Մ. Մնացականյանը, պատվավոր հյուրեր, նախարարության աշխատակիցներ, լրագրողներ:
Ողջունելով վետերաններին` նախարարը շնորհակալություն հայտնեց նրանց անձնվիրության և հայրենիքին մատուցած ծառայությունների համար:
“65 տարի առաջ Դուք սխրանք եք գործել` պաշտպանելով մեր երկրի անկախությունն ու ազատությունը: Մարտի դաշտում Ձեր ցուցաբերած անձնազոհության շնորհիվ Ձեր հետնորդներն ապրել և ապրում են խաղաղ, ապահով և ազատ երկրում”- նշեց պարոն Մնացականյանը:
Ցուցահանդեսի մասնակիցները ևս շնորհավորեցին վետերաններին` ցանկանալով քաջ առողջություն, երջանկություն և անհոգ ծերություն: Հանդիսավոր արարողությանը հետևեց ջերմ ընդունելություն, որի ընթացքում վետերաններին հանձնվեցին խորհրդանշական նվերներ:
Որպես հիշատակ` յուրաքանչյուր վետերանի կհանձնվի նաև իր լուսանկարը:
