Օգոստոսի 22-ին Աշխատանքի և սոցիալական հարցերի նախարար Մանե Թանդիլյանն ամփոփեց իր պաշտոնավարման 100 օրը: Լրագրողների հետ հանդիպման ընթացքում նախարարը ներկայացրեց մայիսի 12-ից հետո ընկած ժամանակահատվածում նախարարության գործունեության հիմնական ուղղությունները, արված աշխատանքներն ու նախատեսվող ծրագրերը։
Նախարարը առանձին կետերով խոսեց դայակների աշխատավարձի փոխhատուցման ծրագրի, վարկերի և ավանդների մասին տեղեկատվության միջոցով նպաստների համակարգի հասցեականության վերանայման և նպաստառուների ցանկի ճշգրտման նպատակով նոր գործիքակազմի ներդրման գործընթացի, ինտեգրված սոցիալական ծառայությունների համակարգի ներդրման ակտիվացմանն ուղղված միջոցառումների և սոցիալական պաշտպանության ոլորտում իրականացվող բարեփոխումների մասին:
Կարևորելով իրականացվող գործընթացները՝ նախարարը նշեց, որ գրեթե յուրաքանչյուր քաղաքացի կյանքի տարբեր փուլերում առնչվում է Աշխատանքի և սոցիալական հարցերի նախարարության հետ, ուստի նախարարությունն ու նրա ծառայությունները քաղաքացու համար դառնում են պետության հայելին։ Հենց այս նախարարության հետ են առնչվում կյանքի ամենադժվարին իրավիճակներում հայտնված մարդիկ, հանրության ամենախոցելի խմբերը, ուստի մեր կողմից մատուցվող ծառայությունները պետք է լինեն հասցեական, նպատակային և արդար,- նշեց Մանե Թանդիլյանը։
Նախարարը անդրադարձավ նաև կեսաթոշակի բարձրացման խնդրին։ Թանդիլյանը տեղեկացրեց, որ նախարարությունը ՀՀ կառավարության հաստատմանն է ներկայացրել կենսաթոշակի, ծերության նպաստի, կերակրողին կորցնելու դեպքում նպաստի, հաշմանդամության նպաստի նվազագույն չափը սահմանել առնվազն պարենային աղքատության նվազագույն շեմից բարձր։
Նախարար Մանե Թանդիլյանը տեղեկացրեց, որ հաշվի առնելով ֆինանսական ռեսուրսների սահմանափակությունը, որոշում է կայացվել ոլորտային բաեփոխումներն ուղղել նախ և առաջ մարդկանց այն խմբին, որն ամենից շատ ունի աջակցության կարիք։ «Հայաստանում չպետք է լինի ծայրահեղ աղքատ քաղաքացի։ Այս որոշման շուրջ արդեն նախնական պայմանավորվածություն կա։ Այս փուլում որոշումը դեռևս վերաբերելու է շուրջ 80 հազար քաղաքացու»,- նշեց Մանե Թանդիլյանը։
Պատասխանելով լրագրողների հարցերին՝ նախարար Մանե Թանդիլյանը վստահեցրեց, որ աշխատանքները լինելու են շարունակական և ուղղված քաղաքացու կյանքի որակի բարելավմանը. մեր երկրի քաղաքացին պետք է զգա, որ ինքը պաշտպանված է պետության կողմից, և պետությունը կատարում է իր դերը:
Նախարարի պաշտոնավարման 100 օրվա ամփոփ հաշվետվության ամբողջական տարբերակին կարող եք ծանոթանալ այստեղ։
