Ազգային ժողովը երկրորդ ընթերցմամբ վերջնականորեն ընդունեց «Նվազագույն ամսական աշխատավարձի մասին» օրենքում փոփոխություններ կատարելու մասին օրինագիծը, որով նախատեսվում է 2020 թվականի հունվարի 1-ից նվազագույն ամսական աշխատավարձը 55000 դրամից բարձրացնել 68000 դրամ: Փոփոխության համաձայն աշխատաժամանակի նորմալ տևողության դեպքում գործավարձով և ժամավճարով վարձատրվող աշխատողների ժամային տարիֆային դրույքի նվազագույն չափը ևս կփոփոխվի՝ 330 դրամից դառնալով 406 դրամ:
2020 թվականի հունվարի 1-ից բարձրանալու են նաև աշխատաժամանակի կրճատ տևողության դեպքում գործավարձով և ժամավճարով վարձատրվող աշխատողների համար ժամային տարիֆային դրույքի նվազագույն չափերը:
Աշխատանքի և սոցիալական հետազոտությունների ազգային ինստիտուտը Պետական եկամուտների կոմիտեի կողմից վարվող տեղեկատվության վերլուծության հիման վրա հաշվարկել է, որ նվազագույն աշխատավարձի բարձրացման արդյուքնում 2020 թվականի հունվարի 1-ից հանրային և մասնավոր հատվածներում շուրջ 187000 աշխատողի աշխատավարձերը կբարձրանան, որից շուրջ 57000 աշխատողինը՝ հանրային, 130000 աշխատողինը՝ մասնավոր հատվածներում:
Հանրային հատվածում նվազագույն աշխատավարձի բարձրացումը ՀՀ 2020թ. պետական բյուջեից կպահանջվի շուրջ 6 մլրդ դրամ՝ առանց եկամտային հարկի, իսկ մասնավոր հատվածի համար կառաջանա շուրջ 17 մլրդ դրամ՝ կրկին առանց եկամտային հարկի, լրացուցիչ ծախս:
Մեր քաղաքացիների համար ևս մեկ անգամ ընդգծում ենք, որ նվազագույն աշխատավարձի բարձրացումն առնչվում է մինչև 68000 դրամ ամսական զուտ աշխատավարձ ստացող և մինչև 406 դրամ ժամային տարիֆային դրույքով վարձատրվող աշխատողներին:
