ՀՀ աշխատանքի և սոցիալական հարցերի նախարարությունում տեղի ունեցավ Հաշմանդամություն ունեցող անձանց հարցերով զբաղվող ազգային հանձնաժողովի հերթական նիստը, որը վարում էր հանձնաժողովի նախագահ, ՀՀ ԱՍՀ նախարար Ա. Գիրգորյանը: Օրակարգում ներառված էր երեք հարց
- “Հաշմանդամություն ունեցող անձանց իրավունքների պաշտպանության և սոցիալական ներառման մասին” ՀՀ օրենքի նախագծի քննարկում,
- հաշմանդամություն ունեցող անձանց հարցերով զբաղվող մարզային հանձնաժողովների կատարած աշխատանքների մոնիտորինգի արդյունքների ներկայացում,
- հաշմանդամություն ունեցող անձանց իրավունքների պաշտպանության իրազեկման միամսյակի միջոցառումերի ծրագրի հաստատում:
Ողջունելով նիստի մասնակիցներին` պարոն Գրիգորյանը նշեց. “Քանի որ սա մեր առաջին համատեղ նիստն է, ցանկանում եմ հավաստիացնել, որ անչափ կարևորում եմ հանձնաժողովի դերը: Ակնկալում եմ բոլորիդ ակտիվ մասնակցությունը: Այս ոլորտում դեռևս ունենք բազմաթիվ չլուծված հարցեր, որոնք պետք է քննարկվեն այստեղ, և ընդունվեն համատեղ լուծումներ”:
Օրակարգը հաստատելուց հետո առաջին հարցի մասին զեկուցումով հանդես եկավ ՀՀ աշխատանքի և սոցիալական հարցերի նախարարի տեղակալ Ջ. Բաղդասարյանը: Նա հանգամանորեն ներկայացրեց նոր օրենքի ստեղծման անհրաժեշտությունը, հիմնական դրույթները, մեր երկրի կողմից 2010թ. վավերացված` ՄԱԿ-ի “Հաշմանդամություն ունեցող անձանց իրավունքների մասին” կոնվենցիայից բխող նոր մոտեցումները: Որոշվեց. նախագծում ներառել այլ նախարարություններից և գերատեսչություններից, ինչպես նաև Ազգային հանձնաժողովի անդամների կողմից արված նոր առաջարկությունները, լրացուցիչ քննարկում կազմակերպել ՀՀ քաղաքաշինության նախարարությունում:
Երկրորդ հարցի մասին ելույթ ունեցավ հաշմանդամների և տարեցների հիմնահարցերի վարչության պետ Ա. Կեսոյանը:
Նա ներկայացրեց մարզերի քաղաքային համայնքներում պետական կառավարման, տեղական ինքնակառավարման մարմինների, հասարակական կազմակերպությունների կողմից շրջակա միջավայրը հաշմանդամություն ունեցող անձանց կարիքներին հարմարեցնելու ուղղությամբ կատարած աշխատանքների մոնիտորինգի արդյունքները:
Ըստ բանախոսի`որոշակի դրական տեղաշարժեր կան, սակայն եզրահանգումը հետևյալն է. մարզերի քաղաքային համայնքներում քաղաքապետարանների շենքերը, փողոցների երթևեկելի և հետիոտն գոտիները, մայթեզրերը, սոցիալական ենթակառույցները` բուժական, կրթական, մշակութային և այլ ծառայություններ տրամադրող կազմակերպությունների շինությունները հիմնականում հարմարեցված չեն հաշմանդամների տեղաշարժման և այլ ծառայություններից օգտվելու համար: Չկան հարմարեցված հասարակական հանգստի վայրեր, սպորտային և մանկական խաղահրապարակներ: Որոշ դեպքերում հարմարեցման նպատակով կատարված աշխատանքները չեն համապատասխանում գործող ստանդարտներին: Շահագրգիռ գերատեսչությունների և կազմակերպությունների կողմից ոչ բավարար ուշադրություն է դարձվում համայնքում բնակվող հաշմանդամություն ունեցող անձանց հիմնախնդիրներին: Ոչ բոլոր մարզերում են ակտիվորեն կիրառվում սոցիալական գործընկերության սկզբունքները:
Որոշվեց. մոնիտորինգի արգյունքները ներկայացնել ՀՀ քաղաքաշինության պետական տեսչություն:
Հանձնաժողովը հաստատեց հաշմանդամություն ունեցող անձանց իրավունքների պաշտպանության իրազեկման միամսյակի միջոցառումերի ծրագիրը:
