2012 թվականին ՀՀ կառավարությունը պետական ոլորտի աշխատողների համար ներդրեց սոցիալական փաթեթի ծրագիրը, որը շարունակվեց նաև 2013 թվականին: Սոցիալական փաթեթը 2012 թվականի համար նախատեսված էր 120000 աշխատողի համար, իսկ 2013 թվականին շրջանակն ընդլայնվել է և կազմել շուրջ 152000 մարդ:
Սոցիալական փաթեթը ներառում է հետևյալ ծառայությունները`
1) առողջապահական փաթեթ` բժշկական օգնության և սպասարկման կազմակերպում և ֆինանսավորում.
2) hիփոթեքային վարկի ամսական վճարի մարում.
3) ուսման վճար.
4) hանգստի ապահովում ՀՀ-ում և ԼՂՀ-ում:
2014 թվականի հունվարի 1-ից սոցիալական փաթեթի պարտադիր պայման հանդիսացող ծառայությունը դարձել է առողջապահական փաթեթը` առողջության ապահովագրության փոխարեն: Առողջապահական փաթեթ ձեռք բերելու համար սոցիալական փաթեթի շահառուն պետք է ստանա առողջապահական փաթեթից օգտվելու հավաստագիր:
Սոցիալական փաթեթի շահառուները սոցիալական փաթեթի գումարների փոխանցման համար յուրաքանչյուր բյուջետային տարի պետք է լրացնեն նոր դիմում, իսկ այն աշխատողները, որոնք ձեռք են բերում սոցիալական փաթեթից օգտվելու իրավունք, ՀՀ աշխատանքի և սոցիալական հարցերի նախարարության պաշտոնական ինտենետային կայքէջում նշված բանկերում պետք է բացեն սոցիալական փաթեթի հաշիվ, որին կփոխանցվի սոցիալական փաթեթի նրանց հասանելի գումարը, որն ամսական կազմում է 11000 ՀՀ դրամ: Սոցիալական փաթեթի գումարն ունի կուտակային բնույթ, այսիքն՝ պահպանվում և կուտակվում է բանկում բացված սոցփաթեթի հաշվին:
Սոցիալական փաթեթի հաշվում առկա դրամական միջոցները կանխիկացման ենթական չեն, բացառությամբ այն դեպքերի, երբ աշխատողը ձեռք է բերում կենսաթոշակ ստանալու իրավունք և դադարում է նրա սոցիալական փաթեթից օգտվելու իրավունքը: Սոցիալական փաթեթի հաշվում առկա դրամական միջոցները կարող են կանխիկացվել նաև աշխատողի մահվան դեպքում` նրա ժառանգի կողմից:
