ՀՀ աշխատանքի և սոցիալական հարցերի նախարար Արտեմ Ասատրյանն ընդունեց ՀՀ-ում Քուվեյթի Արտակարգ և լիազոր դեսպան Բասսամ Մուհամմադ Ալ-Քաբանդիին:
Ողջունելով հյուրին՝ նախարարը շնորհակալություն հայտնեց համագործակցության պատրաստակամության և բարձրացված հարցերին արագ արձագանքելու համար:
Դեռևս 2012 թվականին նախարարությունը դիմել էր քուվեյթյան կողմին՝ Երևանի թիվ 1 տուն-ինտերնատի անկողնային խնամվողների համար նոր մասնաշենք կառուցելուն աջակցելու հարցով:
Դեսպանի ներկայացմամբ՝ Քուվեյթի կառավարությունը քննարկել է հարցը և պատրաստակամություն հայտնել աջակցելու: Պարոն Ասատրյանը շեշտեց, որ նոր մասնաշենքը հնարավորություն կտա հարմարավետ պայմաններ ապահովել տարեցների համար՝ մատուցելով ժամանակակից ծառայություններ:
Դեսպանը տեղեկացրեց, որ Քուվեյթի սոցիալական ապահովության նախարարությունը հետաքրքրություն է ցուցաբերում մեր երկրի սոցիալական ապահովության ոլորտի նկատմամբ, և ինքն ուրախ կլինի նպաստել երկու երկրների նախարարությունների միջև համագործակցության կայացմանը:
Պայմանավորվածություն ձեռք բերվեց համատեղ այցեր կազմակերպել նաև համակարգի խնամքի այլ հաստատություններ, խորացնել և ապահովել համագործակցության շարունակականությունը:
