«Պտղի սեռի խտրական ընտրության դեմ պայքարը» հաջողված ծրագիր է. այսօր` ապրիլի 26-ին, «Երեխայի սեռի խտրական ընտրության դեմ պայքար» ծրագրի ամփոփիչ համաժողովի ժամանակ նման տեսակետ է հայտնել ՀՀ աշխատանքի ու սոցիալական հարցերի նախարար Արտեմ Ասատրյանը: Իր ելույթում նախարարը մասնավորապես նշել է.
«Ողջունում եմ և շնորհակալություն եմ հայտնում այն բոլոր գործընկերներին, ովքեր աջակցել են այս հրաշալի ծրագրի իրականացմանը: ՀՀ կառավարությունը, ժողովրդագրական խնդիրներով պայմանավորված, 2009թ. մշակել է Ժողովրդագրական իրավիճակի բարելավման ազգային ռազմավարություն և դրանից հետո յուրաքանչյուր տարի մենք մեր տարեկան ծրագրերում փորձել ենք իրականացնել անհրաժեշտ միջոցառումներ, որպեսզի հնարավորինս բարելավենք ժողովրդագրական իրավիճակը մեր երկրում:
Ժողովրդագրական իրավիճակի վրա ազդեցությունը բազմակողմանի է՝ ծնելիության, մահացության, վերարտադրողական առողջության և բազմաթիվ այլ գործոններով պայմանավորված, բայց ամենակարևորը՝ դա մտածելակերպի մոտեցման հետ կապված փոփոխություններն են, որոնք իսկապես շատ մեծ ջանքեր են պահանջում:
Ծրագրի ամենամեծ առավելությունն այն է, որ հնարավոր է եղել միավորել բոլորի ջանքերը՝ պետական և տարածքային կառավարման մարմինների, հասարակական կազմակերպությունների և, իհարկե, քաղաքացիների, ովքեր ներգրաված են եղել այս ծրագրում և իրենց փորձով որոշակի ազդեցություն ունեցել մտածելակերպի փոփոխության վրա և փոխել այն մոտեցումները, որոնք իրականում խնդրահարույց են և վտանգավոր:
Մեր բոլոր վերլուծություններն ու ուսումնասիրություններ ցույց են տալիս, որ խնդիրների լուծման հարցում մենք շատ ավելի դժվարին իրավիճակների առջև ենք կանգնում: Այս առումով կարծում եմ, որ ծրագրի իրականացման ժամանակահատվածում՝ ընդամենը 2-3 տարիների ընթացքում, ձեռք բերումները, որոնք ցուցանիշներով են արտահայտվում, շատ կարևոր են ու շատ էական: Սա նշանակում է, որ շատ առարկայական գործողությունների միջոցով հնարավոր է փոխել իրավիճակը, մոտեցումներն ու մտածելակերպը, հետևաբար մեր աշխատանքը պետք է շարունակական լինի, ընդլայնվի: Մենք պետք է փորձենք առավելագույնին հասնել մեր բոլորի ջանքերի միավորման շնորհիվ:
Վերջին մեկ տարվա ընթացքում լուրջ աշխատանքներ են տարվել Ժողովրդագրական իրավիճակի բարելավման ազգային ծրագրի ուղղությամբ, և այդ ծրագիրը թույլ կտա բոլոր հնարավոր ուղղություններով իրականացնել միջոցառումներ՝ ապահովելով երկրի ժողովրդագրական իրավիճակը հատկապես, երբ այսօր մենք ունենք ծերացող հասարակություն:
Մեկ անգամ ևս կարևորելով «Պտղի սեռի խտրական ընտրության դեմ պայքար» ծրագրի արդյունքները՝ շնորհակալություն եմ հայտնում կազմակերպիչներին, անմիջական աշխատանքը կատարողներին և բոլոր այն գործընկերներին, ովքեր ներդրում են ունեցել այս ծրագրի իրականացման գործում: Հաջողություններ ձեր բոլոր աշխատանքներում»:
