Այսօր ՀՀ աշխատանքի և սոցիալական հարցերի նախարար Արտեմ Ասատրյանն ընդունել է ԳԴՀ Բունդեսթագի պատգամավոր, աշխատանքի և սոցիալական հարցերի խորհրդարանական հանձնաժողովի անդամ Ալբերտ Վայլերին:
Ալբերտ Վայլերը շնորհակալություն է հայտնել փոխադարձ հետաքրքրություն ներկայացնող հարցերի շուրջ համատեղ քննարկման հնարավորության համար և հետաքրքրվել Հայաստանում գործազրկության նվազեցման ուղղությամբ տարվող ծրագրերից:
Նախարար Արտեմ Ասատրյանը ներկայացրել է աշխատանքի և սոցիալական պաշտպանության ոլորտում իրականացվող լայնածավալ բարեփոխումները՝ մասնավորապես զբաղվածության ոլորտի ծրագրերը: Նախարարը խոսել է զբաղվածության 14 ակտիվ ծրագրերի մասին, որոնց նպատակը անապահով ընտանիքներում աշխատունակ անձանց աշխատանքային եկամտի ապահովումն է:
«Այս ծրագրերի արդյունավետությունը գնահատելու համար գործում է նաև մոնիթորինգի և գնահատման համակարգ, ինչը թույլ կտա հասկանալ ծրագրերի իրականացման ընթացքում առաջացած խնդիրները»,-նշել է նախարարը:
Անդրադարձ է կատարվել մասնագիտական ուսուցման և վերապատրաստման ծրագրերին, որոնք հնարավորություն են տալիս աշխատաշուկայում անմրցունակ անձանց հմտանալ իրենց մասնագիտության մեջ և բարձրացնել աշխատանք գտնելու հնարավորությունը:
Հանդիպման ավարտին քննարկվել են նաև հնարավոր համագործակցության շրջանակները և երկուստեք կարևորվել են սոցիալական ոլորտում փորձի փոխանակումը:
Նախարար Արտեմ Ասատրյանը շնորհակալություն է հայտնել Ալբերտ Վայլերին Հայոց Ցեղասպանության 100-րդ տարելիցին նվիրված միջոցառումներին մասնակցելու և ցեղասպանությունների կանխարգելման պայքարին միանալու համար:
