Ընտանիքի միջազգային օրը ՀՀ աշխատանքի և սոցիալական հարցերի նախարար Արտեմ Ասատրյանը ՄԱԿ-ի մանկական հիմնադրամի հայաստանյան գրասենյակի ներկայացուցիչ Հենրիետ Ահրենսի հետ այցելեցին վերջերս հաշմանդամություն ունեցող երեխա որդեգրած ընտանիքի:
Ողջունելով և շնորհավորելով ամուսիններին տոնի կապակցությամբ՝ նախարարը քաջալերեց և խրախուսեց ընտանիքին, չնայած այն բոլոր դժվարությունների, որոնք հաղթահարել են ամուսինները փոքրիկի խնամքը և հոգատարությունը իրականացնելիս:
«Նույնիսկ բառերն են ավելորդ շեշտելու ինչ կարևոր գործ եք դուք արել՝ ընտանեկան ջերմ միջավայր ապահովելով այս փոքրիկի համար: Անգնահատելի և խրախուսելի քայլ է, որ պետք է օրինակ դառնա մեր հասարակության համար»,-ամուսիններին ուղղված իր խոսքում ընդգծեց նախարարը:
Անդրադառնալով երեխաների՝ ընտանիքում ապրելու իրավունքն իրացնելուն, նախարարը նշեց, որ երեխաների համար ընտանիքից դուրս հնարավոր չի ստեղծել լավագույն պայմանները և ոչ մի խնամքի հաստատություն, նույնիսկ եթե ապահովված լինի ամենահարմարավետ պայմաններով, երբեք չի կարող փոխարինել ընտանիքին:
Նախարարը անմիջական և ջերմ մթնոլորտում շփվեց 3-ամյա փոքրիկի հետ, խաղալիքներ նվիրեց: Այնուհետև, ամուսինները նախարարին խնդրեցին աջակցել իրենց ևս մեկ երեխա որդեգրելու հարցում:
Ընտանիքի օրը ամփոփվեց ՀՀ աշխատանքի և սոցիալական հարցերի նախարարությունում, որտեղ տեղի ունեցավ երեխաների իրավունքների պաշտպանության ոլորտում իրականացվող բարեփոխումների գործընթացում ՄԱԿ-ի մանկական հիմնադրամի հետ կնքված փոխըմբռնման հուշագրի շրջանակներում իրականացվող աշխատանքների քննարկում:
Հանդիպմանը քննարկվեցին կարիքի գնահատման հիման վրա երեխաներին խնամքի հաստատություններից կենսաբանական և խնամատար ընտանիքներ ուղղորդելու մեխանիզմները:
