ՀՀ աշխատանքի և սոցիալական հարցերի նախարար Արտեմ Ասատրյանը դեկտեմբերի 19-ին մասնակցեց Հայաստանում ՄԱԿ-ի մանկական հիմնադրամի 20-ամյակին նվիրված միջոցառմանը:
Բարձր գնահատելով ՀՀ աշխատանքի և սոցիալական հարցերի նախարարության և ՄԱԿ-ի մանկական հիմնադրամի միջև երկար տարիների համագործակցությունը՝ նախարարը նշեց, որ Երեխաների պաշտպանության ոլորտում մեծ ծավալի աշխատանքներ և տարբեր ծրագրեր են իրականացվել:
«Ներկայումս ձևավորվել են լավ նախադրյալներ, որպեսզի առաջիկա տարիների ընթացքում համակարգային մեծ փոփոխություններ արվեն երեխաների պաշտապանության ոլորտում և իրագործվի այն թեզը, որ մենք ձևակերպել ենք՝ «Երեխան պետք է ապրի ընտանիքում»: Այս թեզի իրագործումը նշանակում է՝ այն ինստիտուցիոնալ կառույցները, որոնք գործում են մեր հանրապետությունում աստիճանաբար պետք է վերափոխվեն: Եւ առաջիկա տարիների ընթացքում պետք է մշակվեն բոլոր չափորոշիչները, կարգերը, որոնք թույլ կտան զարգացնել այլընտրանքային ծառայություններ: Պետք է նշեմ, որ այս ուղղությամբ 2014 թվականին լայնածավալ նախապատրաստական աշխատանքներ են կատարվել և առաջիկայում այդ աշխատանքները գործնական բնույթ կկրեն»,- իր խոսքում ընդգծեց նախարարը:
ՄԱԿ-ի մանկական հիմնադրամի հայաստանյան ներկայացուցիչ Հենրիետ Արենսը նշեց, որ վերջին տարիների ընթացքում ՅՈՒՆԻՍԵՖ-ը ՀՀ կառավարության հետ համատեղ լուրջ բարեփոխումներ է իրականացրել երեխաների իրավունքների պաշտպանության ոլորտում: Եւ ընդգծեց, որ վերջին 20 տարիների ընթացքում Հայաստանում կրճատվել է մանկական հանցագործության դեպքերը:
Միջոցառումը նվիրված էր նաև «Երեխայի իրավունքների մասին» կոնվենցիայի 25-ամյակին, որը մարդու իրավունքների պաշտպանության պատմության մեջ ամենաշատ վավերացումներ անցած համաձայնագիրն է:
Միջոցառմանը ներկա էին քաղաքական, հասարակական գործիչներ, հասարակական կազմակերպությունների ներկայացուցիչներ, երգիչներ, երգչուհիներ և երեխաներ:
