ՀՀ աշխատանքի և սոցիալական հարցերի նախարարի խորհրդականներ Դավիթ Հակոբյանը, Արեգ Սավգուլյանը, մոնիթորինգի բաժնի պետ Արթուր Եղիազարյանը հուլիսի 13-ին մասնակցել են «Երեխայի իրավունքների մոնիթորինգի խնդիրները Հայաստանում», «Երեխայի իրավունքների պաշտպանության մոնիթորինգի համակարգի արդիականացման խնդիրներն ու քայլերը» խորագրերը կրող զեկույցների ներկայացմանը:
«Մարդկային զարգացման միջազգային կենտրոն» ՀԿ գործադիր տնօրեն Արմեն Գալստյանն իր բացման խոսքում շնորհակալություն է հայտնել ՀՀ աշխատանքի և սոցիալական հարցերի նախարարության ներկայացուցիչներին զեկույցի նախապատրաստման շրջանակներում ակտիվ համագործակցության համար:
Նախարարի խորհրդական Դավիթ Հակոբյանը իր հերթին բարձր է գնահատել կատարված աշխատանքները և նշել, որ նախարարությունը ներկայումս աշխատանքներ է տանում «Երեխաների իրավունքների պաշտպանության ռազմավարության 2017-2021թթ. ծրագրի» մշակման ուղղությամբ և հասարակական կազմակերպության կողմից իրականացված «Երեխաների իրավունքների պաշտպանության ռազմավարության 2013-2016թթ ծրագրի» մոնիթորինգի արդյունքները կարող են լավագույնս օգտագործվել նոր ռազմավարության մեջ:
Սոցիալական ոլորտի ազգային մոնիթորինգի ինստիտուցիոնալ կառուցվածքում քաղաքացիական հասարակության ընդգրկման մասին խոսել է նախարարի խորհրդական Արեգ Սավգուլյանը: Նա մասնավորապես նշել է, որ Աշխատանքի և սոցիալական հարցերի նախարարությունը 2016թ. մայիսին ոլորտում գործող տեղական և միջազգային շուրջ 40 հասարակական կազմակերպությունների հետ ստորագրել է Ազգային մակարդակում սոցիալական համագործակցության համաձայնագիր, որի շրջանակներում ստեղծվում է սոցիալական համագործակցության լայն ցանց թե ազգային և տարածքային մակարդակներում: Նախարարի խորհրդականը իր խոսքում ընդգծել է, որ սա ևս պետք է ներառել երեխաների իրավունքների պաշտպանության ազգային մոնիթորինգի գործիքակազմում որպես կարևոր օղակ:
Հանդիպման ավարտին նախարարության ներկայացուցիչները առաջարկել են «Մարդկային զարգացման միջազգային կենտրոն» ՀԿ-ին ընդգրկվել «Երեխաների իրավունքների պաշտպանության ռազմավարության 2017-2021թթ. ծրագրի» մշակման աշխատանքներին: