«Երեխաների խնամքը առաջին հերթին պետք է լինի ընտանիքում կամ միայն ընտանիքում: Որքան էլ պետությունը միջոցներ է ծախսում շուջօրյա խնամքի հաստատություններում երեխաների խնամքը կազմակերպելու համար, միևնույն է, երեխան իրեն ամբողջապես պաշտպանված և լիարժեք կարող է զգալ միայն ընտանիքում, դա կլինի կենսաբանական թե խնամակալի ընտանիք,»,- ընդգծեց ՀՀ աշխատանքի և սոցիալական հարցերի նախարար Արտեմ Ասատրյանը «ՀՀ երեխաների պաշտպանության ոլորտում կանխարգելման և վաղ միջամտության ծառայությունների անհրաժեշտություննն ու կարևորությունը» թեմայով կլոր-սեղան քննարկմանը:
Նախարարի խոսքով երեխայի մուտքը հաստատություն կանխարգելող լավագույն միջոցը այլընտրանքային սոցիալական ծառայությունների տրամադրումն է՝ ցերեկային, սոցիալ-վերականգնողական կենտրոնների ձևավորումը և նրանց ներքո մատուցվող ծառայությունները:
Այս առումով նախարար Արտեմ Ասատրյանը կարևորեց սոցիալական աշխատողի ինստիտուտի կայացումը. «Սոցիալական աշխատող պետք է կարողանա կարիքի ամբողջական գնահատում իրականացնել, թե որն է պատճառը, որ տվյալ երեխան հայտնվում է շուրջօրյա խնամքի հաստատությունում: Եթե մենք պատճառը ճիշտ ախտորոշեցինք, այդ ընտանիքին և երեխային տրամադրեցինք համապատասխան ծառայությունները, հենց դա կլինի մեր կանխարգելման քաղաքականությունը»:
Նախարար Արտեմ Ասատրյանը կարևորեց նաև երեխաների պաշտպանության ոլորտում շահագրգիռ կառույցների հետ համագործակցության շրջանակներում ձեռքբերված արդյունքներն ու դրանց շարունակականությունը: «Պետք է պետական մարմիններ և հասարակական, միջազգային կազմակերպություններ գործընկերության ֆորմատով ձևավորել այն լավագույն համակարգը, որը թույլ է տալու լրացնել բացերը և ամբողջությամբ անցնել կանխարգելման քաղաքականության ներդրմանը: Այս համատեքստում առանձնակի կարևորում եմ ձեր բոլորի կողմից համապատասխան առաջարկությունների ներկայացումը»-ամփոփեց նախարարը:
