ՀՀ աշխատանքի և սոցիալական հարցերի նախարար Արտեմ Ասատրյանը այսօր աշխատանքային հանդիպում ունեցավ 19 hամալիր սոցիալական ծառայությունների տարածքային կենտրոնների ղեկավարների հետ:
Նախարարը ընդգծելով ինտեգրված սոցիալական ծառայությունների ներդրման խիստ անհրաժեշտությունն ու նպատակահարմարությունը՝ նշեց. «Մենք պետք է նկատի ունենանք, որ այս կենտրոնների ներդրմամբ միևնույն ժամանակ փոփոխություն ենք մտցնում սոցիալական պաշտպանության համակարգի ողջ տրամաբանության մեջ: Անցումը քաղաքացուն գումար նշանակելու տրամաբանությունից՝ նրա խնդիրներին արմատական լուծումներ տալու համակարգին, ինտեգրված սոցիալական ծառայությունների ողջ էությունն է »:
Հանդիպման ընթացքում քննարկվեցին միասնական ընդունարանների գործարկմանը, դիմումի ընդունման մեխանիզմներին, դիմում ընդունողի հիմնական պարտականություններին վերաբերող հարցեր:
Նախարարը իր խոսքում կոչ արեց կենտրոնների ղեկավարներին ոչ մի ջանք չխնայել սոցիալական խնդրով կենտրոն դիմած քաղաքացուն պատշաճ մակարդակի ծառայություն մատուցելու, նրա խնդրին մինչև վերջ հետամուտ լինելու և առավելագույն արդյունավետ լուծումներ գտնելու հարցում:
«Քաղաքացիների համար որակյալ սոցիալական ծառայություների տրամադրումը համալիր սոցիալական ծառայությունների միջոցով ապահովելու համար այստեղ ներկա գտնվողներից յուրաքանչյուրը, ինձանից սկսած, կրելու է անձնական պատասխանատվություն»,-իր խոսքը եզրափակեց նախարար Արտեմ Ասատրյանը:
Դիմումների ընդունման միասնական տեղակատվական համակարգի վերաբերյալ ելույթներով հանդես եկան նաև Սոցիալական ապահովության պետական ծառայության պետ Արմեն Աբրահամյանը և պետի առաջի տեղակալ Սմբատ Սաիյանը:
