ՀՀ աշխատանքի և սոցիալական հարցերի նախարար Արտեմ Ասատրյանն սեպտեմբերի 15-ին մասնակցել է Սոցիալական ձեռնարկությունների և գործատուների ցանցի հիմնման պաշտոնական արարողությանը:
Նախարարը շնորհակալություն է հայտնել ԱՄն միջազգային զարգացման գործակալությանը, «Սեյվ դը չիլդրեն» կազմակերպությանը և մյուս գործընկերներին, որոնց աջակցությամբ Հայաստանում ստեղծվում են սոցիալական ձեռնարկություններ և հաշմանդամության ոլորտում խնդիրների լուծման ուղղությամբ ցուցաբերվում է գործուն աջակցություն:
«Վերջին տարիներին կառավարությունը մեծ ուշադրություն է դարձնում հաշմանդամություն ունեցող անձանց հիմնախնդիրների լուծմանը և այդ առումով բավականին նախաձեռնություններ են նաև եղել օրենսդրական, գործնական միջոցառումների իրականացման ուղղությամբ: Առանց մեր գործընկերների՝ առաջին հերթին հաշմանդամություն ունեցող անձանց շահերը պաշտպանող հասարակական կազամակերպությունների մենք չենք կարող արդյունք արձանագրել»,-նշել է նախարարը:
Հաշմանդամություն ունեցող անձանց զբաղվածության հետ կապված Արտեմ Ասատրյանը կարևորել է «Զբաղվածության մասին» օրենքով քվոտայի սահմանումը, որն ապահովում է հաշմանդամություն ունեցող անձանց զբաղվածությունը. «Իսկապես ամենակարևոր խնդիրը հաշմանդամություն ունեցող անձին հասարակություն ինտեգրելն է, իսկ դրա ապահովումը ուղղակիորեն կապված է այդ անձանց զբաղվածության հետ: Մեր վիճակագրության համաձայն այսօր Հայաստանում հաշմանդամություն ունեցող անձանց միայան 7-8 տոկոսն է զբաղված: Ակնհայտ է, որ այս ուղղությամբ մենք անելիքներ ունենք և խնդրի լուծման հետ կապված առաջիկայում նախատեսում ենք մեր գործընկերների հետ համատեղ մշակել օրենքի նախագիծ»:
Նախարարն նշել է նաև, որ 2016 թվականը հայտարարվել է հավասար հնարավորությունների ապահովման տարի, և այդ ուղղությամբ համատեղ գործնական և առարկայական քայլեր են նախատեսված իրականացնել:
Միջոցառման ավարտին քննարկման մասնակիցները ստորագրել են «Սոցիալական ձեռնարկությունների ցանցի» ստեղծման հուշագիրը:
Միջոցառմանը ներկա էին ՀՀ կառավարության, ԱՄՆ դեսպանատան և ԱՄՆ Միջազգային զարգացման գործակալության և այլ կառույցների ներկայացուցիչներ:
