ՀՀ աշխատանքի և սոցիալական հարցերի նախարարության Մասնագիտական կողմնորոշման մեթոդական կենտրոնի մասնագետները սեպտեմբերի 26-28-ին եռօրյա աշխատանքային այցով եղել են Լեռնային Ղարաբաղի Հանրապետությունում:
Այցի հիմնական նպատակը երկու երկրների Աշխատանքի և սոցիալական հարցերի նախարարությունների միջև կնքած համագործակցության հուշագրի շրջանակներում ԼՂՀ-ում մասնագիտական կողմնորոշման և կարիերայի ծառայությունների իրականացման միասնական ծրագրի մշակումն է:
Հանդիպում-քննարկմանը մասնակցել են ներկայացուցիչներ պատասխանատու գերատեսչություններից` ԼՂՀ կրթության և գիտության նախարարությունից, ԼՂՀ զբաղվածության պետական գործակալությունից, ԼՂՀ հանրակրթության ոլորտից, ինչպես նաև ներկայացուցիչներ՝ քաղաքապետարանից:
Հանդիպման ընթացքում Կենտրոնի մասնագետները ներկայացրել են ՀՀ-ում գործող մասնագիտական կողմնորոշման համակարգը, վերջինիս գործառնության սկզբունքները, նպատակները, խնդիրները և զարգացման հեռանկարները: Համակարգը ներկայացնելուց հետո կազմակերպվել է քննարկում` ԼՂՀ-ում մասնագիտական կողմնորոշման համակարգի ներդրման անհրաժեշտության և հնարավորությունների վերաբերյալ: Ներկա մասնագետները մասնագիտական կողմնորոշման համակարգի ներդրման կարևորությունն ընդգծել են հատկապես հանրակրթության ոլորտում: Քննարկման արդյունքում մի շարք առաջարկություններ են հնչել, մասնավորապես՝ ձևավորել «Մասնագիտական կողմնորոշման մեթոդական կենտրոն» ԼՂՀ-ում, դպրոցներում և զբաղվածության կենտրոնում մասնագիտական կողմնորոշում իրականացնող մասնագետների հաստիքներ ստեղծել, մասնագիտական կողմնորոշման աշխատանքներն իրականացվեն նաև հանրակրթության ոլորտում:
Ներկաները ցանկություն են հայտնել մասնակցել Կենտրոնի կողմից իրականացվող վերապատրաստումներին, ձեռք բերել մասնագիտական հմտություններ և ներդնել մասնագիտական կողմնորոշման աշխատանքները համապատասխան կառույցներում:
Քննարկումների արդյունքում հնչեցված հարցին, թե արդյո՞ք ԼՂՀ-ում հնարավոր է ներդնել ՀՀ մասնագիտական կողմնորոշման մեթոդական կենտրոն, մասնակիցները եկան եզրակացության, որ հարցի լավագույն լուծումը կլինի Կենտրոնի աջակցությունը մեթոդաբանության և վերապատրաստումների հարցում:
