Հոկտեմբերի 5-ին ՀՀ աշխատանքի և սոցիալական հարցերի նախարարության, Հայակական Կարմիր Խաչի ընկերության և Շվեյցարական Կարմիր Խաչի միջև ստորագրվել է փոխըմբռնման հուշագիր:
Հուշագրով ապահովվում է համագործակցությունը տարեցների, հաշմանդամություն ունեցող անձանց անհրաժեշտ ծառայությունների մատուցման, սոցիալ-առողջապահական տնային խնամքի մոդելի ներդրման, համայնքային կյանքում նրանց ինտեգրման ուղղությամբ:
Տարեցների ոլորտում իրականացվող բարեփոխումների արդյունավետ իրականացման նպատակով կողմերը կներդնեն նաև իրենց փորձագիտական գիտելիքներն ու կարողությունները, կներկայացնեն առաջարկություններ, հանրային իրազեկման աշխատանքներ:
Միջոցառմանը ներկա ՀՀ աշխատանքի և սոցիալական հարցերի նախարարի տեղակալ Ջեմմա Բաղդասարյանը շեշտել է, որ Հայկական և Շվեյցարական կարմիր խաչի հետ համագործակցությունը տեսնում է սոցիալական պաշտպանության ոլորտում իրականացվող բարեփոխումների համատեքստում:
Կարևորելով ոլորտում առկա խնդիրները, նախարարի տեղակալը նշել է, որ դեռ 2002թ. Հայաստանը միացել է Ծերացման Մադրիդյան Ռազմավարությանը և այս տարիների ընթացքում ընդունվել են մի շարք իրավական ակտեր, իրականացվել են բազմաթիվ ծրագրեր, որոնց նպատակը տարեց մարդկանց կյանքի որակի բարձրացումն է:
Կարևորելով տնային պայմաններում տարեցների խնամքը, տիկին Ջեմմա Բաղդասարյանը ողջունել է «Համայնքային ինտեգրված տնային խնամք և առողջ ծերացում» ծրագրի մեկնարկը, որն իրականացվելու է հայկական կարմիր խաչի ընկերության կողմից շվեյցարական Կարմիր խաչի հետ համագործակցությամբ:
«Վստահ եմ, որ ծրագրի իրագործումը Շիրակի և Լոռու մարզերում կբարելավի տարեց և հաշմանդամություն ունեցող անձանց կյանքի որակը, քանի որ սոցիալ-առողջապահական ծառայությունները տրամադրվելու են գնահատված կարիքի հիման վրա»,-իր խոսքում ընդգծել է նախարարի տեղակալը: