ՀՀ աշխատանքի և սոցիալական հարցերի նախարար Արտեմ Ասատրյանը սեպտեմբերի 23-ին մասնակցել է «Սոցիալական երկխոսությունը Հայաստանում կայուն աշխատաշուկայի համար» սոցիալական գործընկերության 6-րդ Ազգային կոնֆերանսին: Կոնֆերանսը նպատակաուղղված է խթանելու սոցիալական եռակողմ գործընկերությունը և երկխոսությունը ՀՀ-ում:
Նախարարի խոսքով կայուն աշխատաշուկան բավականին փոփոխվող է և զբաղվածության քաղաքականությունը մշակելու համար պարբերաբար իրականացվում են վերլուծություններ:
Ըստ նախարարի՝ այսօր հիմնականում առկա է կառուցվածքային գործազրկության խնդիր. «Պետք է փաստեմ, որ աշխատաշուկայի փոփոխություններին համապատասխան մասնագիտություն ունեցող անձանց խնդիր ունենք: Այսօր թափուր աշխատատեղերը,որոնք հավաքագրվում են մեր զբաղվածության կենտրոնների կողմից, ամսական կազմում են 2000, դրանցից 1000ը կրկնվող են: Խնդիրն այն է, որ որոշակի ժամանակահատվածում հնարավոր չի լինում համալրել համապատասխան մասնագետների բացակայության պատճառով: Եվ զբաղվածության ծրագրերում առաջին հերթին իրականացվում են քայլեր,որոնք ուղղված են հենց այս խնդրի լուծմանը կամ մեղմանը: Մյուս կողմից,այսօր աշխարհում տեղի ունեցող սոցիալ-տնտեսական փոփոխությունների իրավիճակում մարտահրավերները շատացել են և սոցիալական գործընկերության այս ձևաչափը հնարավորություն է տալիս,որպեսզի երեք կողմերը՝ կառավարությունը, գործատուները և արհմիությունները համատեղ քննարկեն խնդիրներն ու լուծումները»:
Այս համատեքստում նախարար Արտեմ Ասատրյանը կարևորել է 2015թ. օգոստոսի 1-ին կնքված Հանրապետական կոլեկտիվ պայմանագիրը և ձևավորված նոր կազմով Հանրապետական եռակողմ հանձնաժողովը: Սա, ըստ նախարարի, կարևոր հարթակ է մեր քաղաքացիներին հուզող սոցիալական ոլորտի խնդիրները համատեղ լուծելու համար: Նախարարը միաժամանակ ընդգծել է միջազգային գործընկերների կողմից փորձի փոխանակման անհրաժեշտությունը և դրանց շրջանակներում ձեռք բերված փորձառությունը, որոնք կիրառելի են Հայաստանում:
Սոցիալական գործընկերության 6-րդ Ազգային կոնֆերանսին մասնակցում էին շուրջ 90 ներկայացուցիչներ պետական և ոչ պետական կառույցներից՝ մասնավորապես Հայաստանի արհմիությունների կոնֆեդերացիայից, Գործատուների միությունից և հասարակական կազմակերպություններից: Կոնֆերանսին մասնակցում էին նաև Գերմանիայի գործատուների միության ներկայացուցիչները, ովքեր ներկայացրել են աշխատաշուկայի կարգավորման և զբաղվածության խթանման բնագավառում Գերմանիայի փորձը, իսկ Լատվիայից ժամանած պատվիրակության անդամները ներկայացրել են Լատվիայի գործատուների ասոցիացիայի փորձը սոցիալական երկխոսուության բնագավառում:
