Հայաստանի Հանրապետության անկախության 24-րդ տարեդարձի կապակցությամբ ՀՀ Նախագահի հրամանագրով «Երևանի «Մանկան տուն» ՊՈԱԿ-ի դաստիարակ Զոյա Արտավազդի ԲԱԴԱԼՅԱՆԸ, «Գյումրու տուն-ինտերնատ» ՊՈԱԿ-ի խնամող- սանիտար Կարինե Գարուշի ՄԽԻԹԱՐՅԱՆԸ և «Վարդենիսի նյարդահոգեբանական տուն-ինտերնատ» ՊՈԱԿ-ի ավագ բուժքույր Շուշան ՍԵՎՈՅԱՆԸ երկարամյա բարեխիղճ և արդյունավետ աշխատանքի համար պարգևատրել են «Աշխատանքային վաստակի համար» մեդալով:
ԶՈՅԱ ԲԱԴԱԼՅԱՆԸ 1982 թվականից աշխատել է «Երևանի «Մանկան տուն» ՊՈԱԿ-ի առաջին ծծկեր բաժանմունքում որպես բուժքույր, իսկ 1986թ. մինչև օրս աշխատում է որպես դաստիարակ՝ իրականացնելով երեք օրականից մինչև վեց ամսական երեխաների խնամքը՝ հետևելով նրանց անհատական հիգիենային, երեխաների աճի և մտավոր զարգացմանը:
Աշխատանքի ընթացքում Զոյա Բադալյանը իրեն դրսևորել է որպես բարեխիղճ և պարկեշտ աշխատող՝ իր պարտականությունները կատարելով սիրով և անմնացորդ նվիրումով:
Աշխատանքային գործունեության ընթացքում տիկին Բադալյանը մանկատան տնօրենի կողմից բազմիցս արժանացել է գրավոր և բանավոր շնորհակալությունների:
ԿԱՐԻՆԵ ՄԽԻԹԱՐՅԱՆԸ 2003 թվականից աշխատում է «Գյումրու տուն-ինտերնատ» ՊՈԱԿ-ում որպես խնամող-սանիտար: Նա խնամում և սոցիալական սպասարկման ծառայություններ է տրամադրում ավելի քան 20 տարեց ու հաշմանդամ խնամվողի:
Կարինե. Մխիթարյանին իր մարդկային արժանիքների համար սիրում ու հարգում է տուն-ինտերնատի ողջ աշխատակազմը և տուն ինտերնատի բնակիչները:
ՇՈՒՇԱՆ ՍԵՎՈՅԱՆԸ 1986 թվականից աշխատում է «Վարդենիսի նյարդահոգեբանական տուն-ինտերնատ» ՊՈԱԿ-ում որպես բուժքույր, 1989 թվականից մինչև օրս՝ ավագ բուժքույր:
Տիկին Սևոյանը համակարգում է տասնյակ բուժքույրերի աշխատանքը, ովքեր բժշկական օգնություն ու սպասարկում են տրամադրում հոգեկան առողջության խնդիրներ ունեցող անձանց:
Աշխատանքային տարիների ընթացքում տիկին Սևոյանը ձեռք է բերել սոցիալական աշխատանքի հմտություններ և տիրապետում է հոգեկան առողջության խնդիրներ ունեցող անձանց հետ աշխատանքի առանձնահատկություններին:
