Սեպտեմբերի 26-ին ՀՀ աշխատանքի և սոցիալական հարցերի նախարարության Ընտանիքի, Կանանց և երեխաների հիմնահարցերի վարչության պետ Գեղանուշ Գյունաշյանը մասնակցել է Գյումրիում տարածաշրջանում ամենամեծ, բազմակի հաշմանդամություն ունեցող երեխաների ցերեկային խնամքի կենտրոնի բացման արարողությանը:
Տիկին Գյունաշյանը ՀՀ աշխատանքի և սոցիալական հարցերի նախարար Արտեմ Ասատրյանի անունից շնորհավորել է տարածաշրջանում իր տեսակի մեջ եզակի «Էմիլի Արեգակ» կենտրոնի բացման կապակցությամբ. «Հայաստանում երեխաների պաշտպանության ոլորտում իրականացվող բարեփոխումների կարևոր մաս է կազմում հաշմանդամություն ունեցող երեխաների խնամքի հաստատությունների բեռնաթափման և վերակազմակերպման ուղղությամբ իրականացվող քայլերը: Համայնքներում նման կենտրոննների ստեղծումը թույլ կտա աջակցել հաշմանդամություն ունեցող երեխաներին և նրանց ընտանիքներին, տրամադրել վերականգնողական այնպիսի ծառայություններ, որոնք կկանխարգելեն երեխաների մուտքը հաստատություններ»:
Տիկին Գյունաշյանը կարևորել է նման կենտրոնների ստեղծման անհրաժեշտությունը հանրապետության այլ մարզերում: «Երեխաների հաշմանդամության վաղ հայտնաբերման և կարիքների գնահատման արդյունքում տրամադրվող մասնագիտական վերականգնողական ծառայությունները հնարավորություն կտան նրանց իրացնել ամբողջական կարողություններն ու հմտությունները՝ հասարակությանը լիարժեք ինտեգրվելու համար»,-ընդգծել է տիկին Գյունաշյանը:
Ներկայումս կենտրոնում 40 երեխայի տրամադրվում են մի շարք վերականգնողական ծառայություններ՝ ֆիզիոթերապիա, արտթերապիա, երաժշտաթերապիա:
Կենտրոնի բացման արարողությանը մասնակցում էին ՀՀ-ում Գերմանիայի արտակարգ և լիազոր դեսպանը,Հայաստանի, Վրաստանի եւ Արևելյան Եվրոպայի կաթողիկե եկեղեցու առաջնորդ, «Հայկական Կարիտաս» բարեսիրական հասարակական կազմակերպության նախագահ Հայր Ռաֆայել Արքեպիսկոպոս Մինասյանը, ՀՀ աշխատանքի և սոցիալական հարցերի Հաշմանադամության հիմնահարցերի բաժնի պետ Աննա Հակոբյանը, մարզային և համայնքային կառույցների ներկայացուցիչներ:
