ՀՀ աշխատանքի և սոցիալական հարցերի նախարար Մ. Մնացականյանն ընդունեց ԱՄՆ Միջազգային զարգացման գործակալության (ԱՄՆ ՄԶԳ) մի խումբ պատասխանատուների` առաքելության ղեկավար տ. Ջաթինդեր Չիմայի գլխավորությամբ:
Շնորհավորելով նախարարին` պատասխանատու պաշտոնում նշանակվելու կապակցությամբ, տիկին Չիման նշեց, որ տարիների պատմություն ունեցող համագործակցությունը տվել է հիանալի արդյունքներ:
“Մենք միշտ սիրով ենք աշխատել նախարարության պատասխանատուների հետ և այժմ էլ պատրաստ ենք աջակցել իրականացվող աշխատանքներին”,-ասաց առաքելության ղեկավարը: Նա ներկայացրեց սոցիալական բարեփոխումների գրասենյակի նոր պատասխանատուներին, խոսեց նոր համատեղ ծրագրի ենթաբաղադրիչների մասին:
Շնորհակալություն հայտնելով մինչ այժմ կատարված աշխատանքների համար, պարոն Մնացականյանը նշեց, որ ԱՄՆ ՄԶԳ-ն մեր երկրում, մասնավորապես` սոցիալական պաշտպանության ոլորտում, իրականացրել է մեծ և արդյունավետ աշխատանք: Նոր ծրագրով նախատեսվում է աջակցություն կենսաթոշակային և աշխատաշուկայի բարեփոխումների գործընթացին: Կարևորելով դրանք, նախարարն առանձնահատուկ շեշտեց կենսաթոշակային բարեփոխումների մատչելի իրազեկման խնդիրը:
“Մենք պետք է կարողանանք իրականացնել, ես կասեի, ժողովրդական իրազեկում, որովհետև բարեփոխումների ընթացքը մեծապես կախված է դրանից”,-ասաց պարոն Մնացականյանը:
Պայմանավորվածություն ձեռք բերվեց կարճ ժամանակում ձևավորել աշխատանքային խմբեր և սկսել քննարկումները:
