ՀՀ կառավարությունը հուլիսի 31-ի նիստում ընդունել է “Հայաստանի Հանրապետության կառավարության 2012 թվականի դեկտեմբերի 20-ի N 1676-Ն որոշման մեջ փոփոխություններ և լրացումներ կատարելու մասին” ՀՀ կառավարության որոշումը:
Որոշմամբ կարգավորվում են սոցիալական վճարների անձնավորված հաշվառմանը և “Կուտակային կենսաթոշակների մասին” ՀՀ օրենքի 81-րդ հոդվածի 1-ին մասով սահմանված` մինչև 2017 թվականի հուլիսի 1-ն ընկած ժամանակահատվածի համար սոցիալական վճար կատարելու պարտականությունից հրաժարվելու իրավունքի իրացմանը առնչվող հարցեր: Մասնավորապես, եթե սոցիալական վճար կատարելու պարտականությունից հրաժարվելու դիմումը ներկայացվում է (դիմումը մուտքագրվում է տեղեկատվական համակարգ) 2014 թվականի հուլիս և (կամ) օգոստոս ամիսներին (բայց ոչ ավելի ուշ, քան հուլիս ամսվա անձնավորված հաշվարկը ներկայացնելը), ապա անձը ազատվում է նաև 2014 թվականի հուլիս և օգոստոս ամիսների աշխատավարձից սոցիալական վճար կատարելու պարտականությունից, իսկ եթե ներկայացվում է հուլիս ամսվա անձնավորված հաշվարկը ներկայացնելուց հետո, ապա անձը ազատվում է սոցիալական վճար կատարելու պարտականությունից՝ սկսած հաջորդ ամսվա 1-ից (օգոստոս ամսվա աշխատավարձից):
Որոշմամբ հաստատված հավելվածով սահմանված են սոցիալական վճար կատարելուց հրաժարվելու դիմում ներառվող տվյալների կազմն ու բովանդակությունը:
Վարձու աշխատողը (բացառությամբ հարկային գործակալի պարտականություններից ազատված գործատուի վարձու աշխատողի) դիմումը ներկայացնում է գործատուին` թղթային տարբերակով: Թղթային դիմումը պետք է պարունակի.
1) գործատուի անվանումը,
2) դիմողի անունը, ազգանունը, հայրանունը, անձը հաստատող փաստաթղթի սերիան ու համարը, հանրային ծառայությունների համարանիշը կամ հանրային ծառայությունների համարանիշ չունենալու մասին տեղեկանքի համարը,
3) հավաստում այն մասին, որ դիմողը տեղեկացված է, որ սոցիալական վճար կատարելուց հրաժարվելու կամարտահայտությունը տարածվում է մինչև 2017 թվականի հուլիսի 1-ն ընկած ժամանակահատվածի վրա և 2017 թվականի հուլիսի 1-ից կատարելու է սոցիալական վճարներ (լրացվում է միայն 1974 թվականի հունվարի 1-ից հետո ծնված անձի դեպքում),
4) դիմումը ներկայացնելու օրը, ամիսը, տարին,
5) դիմողի ստորագրությունը:
Անհատ ձեռնարկատերը, նոտարը և հարկային գործակալի պարտականություններից ազատված գործատուի վարձու աշխատողը սոցիալական վճար կատարելուց հրաժարվելու դիմումը ներկայացնում է էլեկտրոնային եղանակով, անձնավորված հաշվառման համակարգի միջոցով: