Հոկտեմբերի 1-ին` Տարեցների միջազգային օրը, ՀՀ աշխատանքի և սոցիալական հարցերի նախարար Արտեմ Ասատրյանը, փոխնախարար Ջեմմա Բաղդասարյանը և նախարարության այլ աշխատակիցներ այցելեցին Նորքի տուն-ինտերնատ:
Նորքի տուն ինտերնատում մեծ ոգևորություն էր տիրում, քանի որ տարեցների համար հոկտեմբերի 1-ից գործելու էր «Skype» համակարգչային սենյակը, որտեղ նրանք հնարավորություն կունենան շփել երկրից դուրս գտնվող իրենց հարազատների հետ, կփորձեն գտնել իրենց երեխաներին, մանկության ընկերներին:
Նախարար Արտեմ Ասատրյանը «Skype» սենյակի հանդիսավոր բացումից հետո շրջեց հաստատությունում, ծանոթացավ վերջին շրջանում կատարված աշխատանքներին, խնդիրներին և տվեց համապատասխան հանձնարարականներ:
Այնուհետև նախարարը մասնակցեց տուն ինտերնատում կազմակերպված ճաշկերույթին: Մեկ անգամ ևս շնորհավորելով ինտերնատի տարեց բնակիչներին՝ նրանց առողջություն մաղթեց, երկար տարիների կյանք և անհոգ ծերություն: Նախարարը նաև հետաքրքրվեց տարեցների խնդիրներով, խոստացավ հետամուտ լինել դրանց շուտափույթ լուծմանը, լսեց նրանց ցանկությունները, անձնական խնդրանքները:
Տուն-ինտերնատում լրագրողների հետ հանդիպման ժամանակ նախարար Արտեմ Ասատրյանը անդրադառնալով սոցիալական պաշտպանությանը և խնդիրներին՝ նշեց, որ այսօր Հայաստանում բավական առարկայական հիմքերի վրա են դրված դրանց լուծումները, և այսօր նախարարության ենթակայության տակ գտնվող 4 հաստատություններում տարեցներին տրամադրվում է նվազագույն սոցիալական ծառայություններ փաթեթ, որից առաջին հերթին օգտվում են իրենց ընտանիքներում չխնամվող, կամ միայնակ ապրող, անժառանգ տարեցները: Բացի այդ, նախարարը նշեց, որ տարեցներին շուրջօրյա խնամքով ապահովելու ծառայությունների որակն ու արդյունավետությունը բարձրացնելու ուղղությամբ նախարարության կողմից շարունակական բնույթ կրող աշխատանքներ են կատարվում:
Նախարարը անդրադարձավ նաև կառավարության կողմից հաստատված տարեցներին տրամադրվող նոր սոցիալական ծառայությունների հայեցակարգին, մասնավորապես նշելով, որ առաջիկայում նոր մոդելներ են ներդրվելու, և այդ ուղղությամբ նախարարությունը բազմածավալ աշխատանքներ է իրականացնում:
Նախարար Արտեմ Ասատրյանի այցը Նորքի տուն-ինտերնատ ավարտվեց տարեցների երգ ու պարով, գեղեցիկ մաղթանքների ուղեկցությամբ:
Հոկտեմբերի 1-ին տոնական միջոցառումներ են տեղի ունեցել նաև Երևանի թիվ 1 տուն-ինտերնատում, «Տնային պայմաններում միայնակ տարեցների և հաշմանդամների սոցիալական սպասարկաման կենտրոնում», Գյումրու տուն-ինտերնատում: Բոլոր հաստատություններում ևս կազմակերպվել էր տոնական համերգային ծրագրեր՝ տարբեր երգի և պարի համույթների մասնակցությամբ, որոնք մեծ ոգևորություն պարգևեցին տարեց բնակիչներին:
