Գավառի մանկատան սաները Հայոց Ցեղասպանության 100-րդ տարելիցին ընդառաջ այցելել են Հայոց Ցեղասպանության հուշահամալիր:
Նրանք ծաղիկներ են դրել ցեղասպանության զոհերի հիշատակը հավերժացնող անմար կրակի մոտ և մեկ րոպե լռությամբ հարգել անմեղ զոհերի հիշատակը:
Հուշահամալիրի առջև երեխաները կատարել են «Սուրբերու աչքեր» երգը՝ իրենց փոքրիկ մասնակցությունն ունենալով 100-րդ տարելից շրջանակներում իրականացվող միջոցառումներին:
Մանկատան տնօրեն Նիկոլայ Նալբանդյանը կարևորելով նման ճանաչողական միջոցառումները՝ նշել է, որ 2015 թվականի յուրաքանչյուր օր մեր ժողովրդի համար ոգեկոչման և խոնարհման օր է, հոգևոր երթ դեպի նահատակների հուշարձաններ:
«Այսօր Գավառի մանկատան երեխաները, այցելելով հուշահամալիր՝ մասնակից եղան այն ցավին, ինչը տարիներ առաջ զգացել է հայ ժողովուրդը: Մեր երեխաների հետ միասին միանում ենք պահանջի պայքարին՝ դատապարտելով ոճրագործությունը: Հիշում ենք և պահանջում»,-ասել է մանկատան տնօրենը:
