Ապրիլի 17-ին ՀՀ աշխատանքի և սոցիալական հարցերի նախարարությունում տեղի է ունեցել քննարկում հոգեկան առողջության խնդիրներ ունեցող անձանց խնամքի և սոցիալական համակարգի բարեփոխումների վերաբերյալ:
ՀՀ աշխատանքի և սոցիալական հարցերի նախարար Արտեմ Ասատրյանը կարևորել է հոգեկան առողջության խնդիրներ ունեցող անձանց կարիքների գնահատման անհրաժեշտությունը և նշել, որ գնահատման արդյունքները հիմք կհանդիսանան համապատասխան խնամքի և սոցիալական սպասարկման այլընտրանքային ծառայությունների մոդելների մշակման և ներդրման համար:
Հանդիպման ընթացքում ներկայացվել են հոգեկան առողջության խնդիրներ ունեցող անձանց կարիքների և կարողությունների գնահատման մեթոդաբանությունը: Նախարար Արտեմ Ասատրյանի հանձնարարականով ստեղծվել է հոգեբանից, հոգեբույժից և սոցիալական աշխատողից բաղկացած խմբեր, ովքեր հարցաշարերի միջոցով հանրապետության խնամքի հաստատություններում և Վարդենիսի նյարդահոգեբանական տուն-ինտերնատ ընդունվելու համաշվառված անձանց հետ իրականացրել են կարիքների և կարողությունների գնահատման աշխատանքներ:
Գնահատված կարիքների հիման վրա մշակվել են խնամքի և սոցիալական սպասարկման ծառայությունների չափորոշիչներ:
Ներկայացվել է նաև հոգեկան առողջության խնդիրներ ունեցող անձանց խնամքի և սոցիալական ծառայությունների տրամադրման մոդելները/ուսումնասիրվել է միջազգային փորձը/ և փորձնական ծրագրի իրականացման համար ֆինանսավորման առաջարկվող մեխանիզմները:
Հանդիպմանը ներկա «Բաց հասարակության հիմնադրամներ – Հայաստան» կազմակերպության ներկայացուցիչը ներկայացրել է կազմակերպության աջակցությամբ փորձնական ծրագրի շրջանակում Արագածոտնի և Լոռու մարզերում ընտրված տարածքներում հոգեկան առողջության խնդիրներ ունեցող անձանց համար շուրջօրյա խնամքի տների ստեղծման ուղղությամբ /կազմակերպչական, վերանորոգման և կահավորման/ աշխատանքները:
