Դեկտեմբերի 17-ին ՀՀ աշխատանքի և սոցիալական հարցերի նախարարության և «Ծնողազուրկ հայ երեխաների օգնության միություն» բարեգործական հիմնադրամի միջև երեխաների պաշտպանության ոլորտում կնքվել է համագործակցության փոխըմբռնման հուշագիր:
Հուշագիրը կնքնվել է՝ հաշվի առնելով Հայաստանում երեխաների պաշտպանության ոլորտում իրականացվող բարեփոխումները, դրանց շրջանակներում նախարարության կողմից սահմանված առաջնարհերթություններն ու կարիքները, նախարարության ենթակայությամբ գործող երեխաների խնամքի հաստատություններում առկա հիմնախնդիրները:
Փոխըմբռնման հուշագրի նպատակը նախարարության և կազմակերպության միջև համակարգված, բազմակողմանի համագործակցության զարգացման խթանումն է, ինչպես նաև երեխաների պաշտպանության ոլորտի շարունակական զարգացմանն ուղղված համագործակցությունը:
Հանդիպման ընթացքում ՀՀ աշխատանքի և սոցիալական հարցերի նախարար Արտեմ Ասատրայնը կարևորել է կայուն համագործակցությունը երեխաների պաշտպանության ոլորտում գործող կազմակերպությունների հետ և նշել, որ նրանց կողմից իրականացվող ծրագրերը պետք է համահունչ լինեն ներկյումս ոլորտում իրականացվող քաղաքականությանը:
Նախարարն անդրադարձել է նաև երեխայի մուտքը հաստատություներ կանխարգելման անհրաժեշտությանը. «Այլընտրանքային ծառայությունների ներդրումը, սոցիալակա աշխատողի՝ մասնավորապես դեպք վարողի կողմից խոցելի ընտանիքների կարիքների իրական գնահատումը թույլ կտա գտնել լուծումներ և ընտանիքի կարիքներին ուղղված սոցիալական, հասցեական աջակցություն տրամադրել», -ընդգծել է նախարարը:
Փոխըմբռնման հուշագրի կնքման արարողությանը ներկա էին «Ծնողազուրկ հայ երեխաների օգնության միություն» բարեգործական հիմնադրամի ղեկավար Ջորջ Յաղուբյանը, « Տիրամայր Հայաստանի» կենտրոնի մեծավորուհի, քույր Արուսյակ Սաճոնյանը, հիմնադրամի ներկայացուցիչներ:
