Ամանորը Նորքի տուն ինտերնատի տարեցները կդիմավորեն վերանորոգված լոգասենյակներով

0
54

Դեկտեմբերի  29-ին Նորքի տուն-ինտերնատում բացվել են երկու մեծ լոգասենյակներ՝  կանանց և տղամարդկանց համար:

 

ՀՀ աշխատանքի և սոցիալական հարցերի նախարարի խորհրդական Նարինե Բալայանը նախարար Արտեմ Ասատրյանի անունից շնորհակալություն է  հայտնել կատարված աշխատանքների համար՝ նշելով, որ վերանորոգված լոգասենյակները լիովին կբավարերեն տուն-ինտերնատում խնամվող տարեցների կարիքները: «Ճիշտ խնամքն ու  համապատասխան պայմանները կարևոր նշանակություն ունեն   բոլորիս կյանքում և մեր տուն ինտերնատում խնամվող տարեցները,  գտնվելով ընտանիքներից հեռու, նույնպես պետք է ստանան լավագույն խնամք և շրջապատված լինեն լավագույն պայմաններով: Եվս մեկ անգամ նախարարի անունից շնորհակալություն եմ հայտնում շինարարական աշխատանքների մեջ ընդգրկված բոլոր անձանց: Առանձնակի շնորհակալություն եմ հայտնում տուն ինտերնատի ողջ անձնակազմին  մեր տարեցների նկատմամբ ունեցած ջերմ և բարյացակամ վերաբերմունքի համար»,-ընդգծել է նախարարի խորհրդականը:

 

Լոգասենյակները վերանորոգվել են  ՀՀ վարչապետ Հովիկ Աբրահամյանի հանձնարարականով, երբ վարչապետը 2015թ. նոյեմբերի 5-ին այցելել էր տուն-ինտերնատ և տեղում ծանոթացել  խնդրին:  Վերանորոգման աշխատանքների վրա ծախսվել է շուրջ  4 մլն դրամ:  

 

Բացման արարողությունից հետո տուն-ինտերնատում տեղի է ունեցել ամանորյա տոնական միջոցառում, որտեղ ուրախ տրամադրությամբ  Ձմեռ պապն ու Ձյունանուշը նվերներ են բաժանել տարեցներին,  երգել ու պարել նրանց հետ:

 

Միջոցառմանը ներկա էին  ՀՀ աշխատանքի և սոցիալական հարցերի նախարարության աշխատակազմի ղեկավար Արտակ Գրիգորյանը,  Հաշմանդամների և տարեցների  հիմնահարցերի վարչության պետ Արթուր Կեսոյանը, տուն ինտերնատի բարեկամներ: