Սեպտեմբերի 16-ին Գեղարքունիքի մարզի Գավառ քաղաքում ՀՀ զբաղվածության գործակալության նախաձեռնությամբ կազմակերպվել է աշխատանքի տոնավաճառ, որտեղ ներկայացվել է 104 թափուր աշխատատեղ, որից 67-ը առկա, իսկ 47-ը սպասվելիք:
Աշխատանքի տոնավաճառ աշխատանք փնտրելու էին եկել 400-450 աշխատանք փնտրողներ, ովքեր ծանոթացել են առաջարկվող աշխատանքներին, գործատուներին փոխանցել ինքնակենսագրականներ, տեղում պայմանավորվել հետագա հանդիպումների համար:
«Գավառի բիզնես կենտրոն» ՀԿ նախագահ Անահիտ Շահզադյանը իր խոսքում նշել է, որ աշխատանք առաջարկելու նման հարթակները արդյունավետ կարող են լինել գործատուների ու աշխատանք փնտրողների համար:
Տոնավաճառի ավարտին ՀՀ զբաղվածության գործակալության պետ Արտակ Մանգասարյանը Գավառի զբաղվածության տարածքային կենտրոնի հետ ակտիվ համագործակցության համար շնորհակալագրեր է հանձնել թվով 7 գործատուների:
Միջոցառմանը մասնակցում էին ՀՀ ԶՊԳ պետ Արտակ Մանգասարյանը, Գեղարքունիքի փոխմարզպետ Արտաշես Նիկոյանը, մարզպետարանի սոցիալական ապահովության բաժնի պետ Սուրիկ Խարատրյանը, Գավառի քաղաքապետարանի աշխատակազմի ղեկավար Կարինե Մանուկյանը, և մարզում գործող հասարակական կազմակերպությունների ներկայացուցիչներ:
